Sdang ka 1st Badminton Tournament jong ka BPG Shillong, ïashimbynta palat 200 ngut ki nongïalehkai

Shillong, Naitung 24: Ka Badminton Promotional Group Shillong ha ka 24 tarik Naitung, 2025 ka la ïoh ban plie pyrda ïa ka lympung ïalehkai Badminton kaba la tip da ka 1st Badminton Promotional Tournament , 2025 ha JN Sports Complex, Polo.
Ïa kane ka lympung la wan plie pyrda da u Dr W Kharshiïng, u ba dei President jong ka MSBA kum u Kongsan ha ka jingïadonlang u District Sports Officer jong ka West Khasi Hills bad ïa ka jingïalang la pynïaid da u Bah T Diengngan General Secretary BPGS.
Ha kane ka lympung ka ban ïaid lai sngi lynter naduh ka 24 tarik haduh 26 tarik Naitung, 2025 ka la sakhi ïa ka jingïashim bynta haduh 273 ngut ki nongïalehkai (Shynrang bad Kynthei) na ki District bapher bapher jong ka Jylla kiba ïakhun ha ki kyrdan bapher bapher.
Ka jingthmu jong ka BPG Shillong da kaba pynlong ïa kane ka lympung ka long ban ai ïa ka rynsan na ka bynta ki nongïalehkai ka Jylla Meghalaya ban pynkhreh bad pynjanai ïalade na ka bynta ka State level championships bad kumjuh ruh ïa ka national levels.
Ha kajuh ka por ka BPG Shillong ka thmu ban pynroi ïa ki sap ïalehkai badminton bad pynshlur ïa ki paid nongshong shnong ka Jylla ban im ïa ka jingim kaba koit kaba khiah da kaba shim bynta ha ki jingïalehkai bapher bapher.