Delhi, Naitung, 22: U Myntri Sorkar Pdeng ba dei khmih ïa ka Tnad Communications bad ka Tnad Development of North Eastern Region (DONER), u Jyotiraditya M. Scindia, ha ka sngi Ba ar u la ïashim bynta ha ka jingïalang jong ka kynhun treikam ba ha khlieh duh kaba la pynleit jingmut ha kaba pynkhlaiñ ïa ka kam shna jaiñ bad ka jingtrei kti ha ka thaiñ shatei lammihngi. Ïa kane ka jingïalang la pynïaid da u Myntri Rangbah ka Jylla Nagaland u Neiphiu Rio, ha ryngkat ki nongïashim bynta ba pawkhmat ba kynthup ïa u Myntri Sorkar Pdeng ba dei khmih ïa ka Tnad Tnad Textiles u Giriraj Singh, u Myntri Rangbah ka Jylla Mizoram u Lalduhoma, u Myntri ba dei khmih ïa ka Tnad Handloom & Textiles jong ka jylla Assam Urkhao Gwra Brahma, ki heh ophisar jong ka Tnad DoNER, lem bad ki heh ophisar na ka sorkar jylla Manipur bad Sorkar India.
U Myntri Sorkar Pdeng u la pynpaw ïa ka lad kaba khraw ba don ha ka thaiñ shatei lammihngi ban ïalam ïa ka jingkylla ha ka kam ba ïadei bad ka riam ka beit ba lah ban neh jong ka ri India, da kaba pynkynmaw ïa ka jingthmu jong u Myntri Rangbahduh ka ri Narendra Modi kaba long ‘Ka riam na ka bynta ka mariang bad ka jingpynkupbor.’ Lyngba ka pateng ba riewspah jong ka ha ki rukom treikam kiba ïadei bad ka mariang, ka jingtbit ha ka kam shna jingshna, bad ka jingtrei kti ba kyrpang, ka thaiñ ka don ha ka kyrdan kaba kyrpang ban ïalam ïa ka jingkylla sha ka rukom kaba khuid, kaba kynthup lang ïa ka pyrthei baroh kawei. U Scindia u la ong, “Ka thaiñ shatei lammihngi ka dei ban pyndonkam ïa ka pateng kaba riewspah jong ka ha ki jingshna jaiñ bad ki jingtrei kti ban pynmih ïa ki lad kamai kajih, ban kyntiew ïa ka jingsaiñdur thymmai, bad ban buh ïa ka pateng jong ka kolshor jong ka India ha ka rynsan jong ka pyrthei.”
U Myntri Sorkar Pdeng ka Tnad Textiles, u Giriraj Singh u la ong ba ka Tnad Textiles kan trei halor ki jingai jingmut ba kordor ba la ïasam da ki jylla ka thaiñ shatei lammihngi ha ka jingïalang jong ka kynhun treikam ba ha khlieh duh mynta ka sngi da ka jingaiti bad jingïatreilang kaba pura, khnang ba ka jingsaiñdur, ka kolshor, bad ki nongtrei kti jong ka thaiñ shatei lammihngi kin ïoh ïa ka rynsan ha kylleng ka pyrthei.
Ka jingïalang ka la pynleit jingmut ha kaba pynim biang ïa ka jinglong jingman jong ki kam trei kti bad ki kam shna jaiñ lyngba ki jingïarap ba la thmu kum ka jingpynbha ïa ka lad ban ïoh ïa ki iew ki hat, ka jingpyndonkam ïa ka teknoloji, ka jingkyntiew ïa ka bor treikam, bad ka jingplie ïa ki lad kamai kiba lah ban neh. Ka kynhun treikam ka thmu ban ïatreilang bad baroh ki nongshim bynta ban kyntiew ïa ka kam trei kti bad kam shna jaiñ kum u mawjam jong ka roi ka par kaba neh bad ka jingkiew shaphrang kaba kynthup lang ha ka thaiñ.
Ha kane ka jingïalang, u Myntri Sorkar Pdeng u la pynpaw ïa ka jingthmu ban wanrah jingkylla na ka bynta kane ka tnad, da kaba ban jur ïa ka jingpynkylla thymmai lyngba ki jingkyntiew ïa ki jingdon jingem, ka jingpynïasoh lad digital bad ka jingsaiñdur, bad ka jingkyntiew ïa ka sap. Ki sienjam ba kongsan ki kynthup ïa ka jingseng ïa ki kynhun jong ki nongtrei kti, ka jingseng ïa ki Common Facility Centre, bad ka jingithuh ïa ki mar ba kongsan ha kylleng ka thaiñ na ka bynta ban kyntiew ïa ka ri. Ka rukom treikam ka ban jur ïa ka jingpynkhreh ïa ka iew da kaba pynïadei ïa ki Self-Help Group bad ki jinglong jingman jong ka pyrthei bad kyntiew ïa ka kam naduh ki kyrdan kiba hapoh tam, da kaba thmu ban pynkupbor ïa ki kam shna jingshna ha ka ri ban roi hapoh ka ri bad shabar ri.
