SHILLONG, Naitung 20: Ha ka sien kaba nyngkong ha ka histori ka jylla Meghalaya kan sdang ban ïashim bynta ha ka Rainforest Challenge (RFC) Goa 2025, kawei na ki lympung ïakop ñiah kali ba jwat tam ha ka pyrthei.
Ka kynhun kaba don 10 ngut, kin mihkhmat ïa ka Jylla da ka jingsngew sarong da kaba ïaid ïa ka la lynti kaba jngai palat 3,000 Kilometre da ka kali lyngba ka surok na Shillong sha Goa, da kaba rah ryngkat ka jingthoh “From the Hills to Goa” kaba mut “Na ki lum sha Goa”.
ïa kane ka sienjam ban leit ïashim bynta la kyrshan da ka tnad jngohkai jong ka Sorkar Jylla Meghalaya, kumjuh ruh da ka tnad ïalehkai bad Hello Meghalaya, kaba pyni ïa ka jingshimkhia jong ka jylla ban pynroi ïa ki jingïalehkai haki rukom bapher bapher, kumjuh ruh ban kyntiew ïa ka kam jngohkai pyrthei, bad pyni ïa ka jingsngewtynnat jong ka Meghalaya ïa ki lympung ïakop ñiah kali.
ïa kane ka kynhun ñiah kali 4X4 jong ka Meghalaya (Meghalaya 4X4) la ïalam da u Vicky.V.Kharkongor – Team Director, ryngkat bad u nongñiah kali uba tbit u Vianney B Nongrum u ban ñiah ïa ka kali ha ki bynta ba jynjar jong ka RFC (ka jingïakop ñiah kali haki jaka ktieh, jaka wah bad ki jaka khlaw ba long lum ba khohruh khohram).
Ka jingïashim bynta ha ka RFC Goa ka dei ka por kaba pynthikna ïa ka kolshor motorsport jong ka Meghalaya. Ka buh ïa ka jylla ha ryngkat bad ki nongïakop ñiah kali motorsport ba pawnam jong ka India, kaba thaw lad ïa ki samla kiba sngewtynnad ïa kane ka jingïalehkai, ka kyntiew ïa ka jingshai jong ka kam jngohkai pyrthei, bad ka pynshlur ïa ki samla ban shimkhia ïa ki jingïalehkai ba ki sngewtynnad kum ka kam.
Kane ka jingleit ïashim bynta ym tang ban kan tynjuh ïa ka jingtbit bad ka jinglah ban shah hynrei kan ïathuh ruh ïa ka khana jong ka jingangnud bad jingsarong na ka bynta ki paidbah ka Meghalaya.
Ka Rainforest Challenge kadei ka lympung ïakop ñiah kali kaba pawnam bad kaba jwat bha, ha kaba ki kali kin hap ban ïaid lyngba ki surok ktieh, ki wah, bad ki lynti khlaw.
“Kane kam dei tang ka jingïakop; kadei ka thong ban buh ïa ka Meghalaya ha ka map motorsport jong ka India. Ngi kwah ban ai mynsiem ïa ka pateng ban wan jong ki nongñiah kali off-road bad ban pyni ba ki briew na ri lum ki don ïa kaei kaba donkam ban ïakhun ha ka kyrdan kaba ha khlieh duh.”
Ka thup kyrteng jong ki dkhot ka kynhun ki long:
Vicky V Kharkongor, Vianney B Nongrum, Arlan M Kharumnuid, Patsha Kharkongor, Overcome Shadap, Albinus HL Laskor, Ambet N Khonglah, Babitdor J Kharkamni, Baniaidshaphrang L Nongbri, Gabriel Marwein.
Ka kynhun kan mih na Jylla ha kane ka sngi Nyngkong (21 tarik Naitung, 2025) ha kaba ka Rainforest Challenge (RFC) Goa 2025 kan sdang naduh ka 28 tarik Naitung, 2025 haduh ka 03 tarik Nailar, 2025.
