Shillong, Naitung 20: Ka Mawkasiang SC ka la pynjlan shuh ïa ka jingjop jong ki ha ka lympung U-20 Fourth Division 2025 jong ka Shillong Sports Association, sha ka hynriew sien ïalehkai da kaba pynliem noh ïa ka Mawnianglah SC da 3-1 kol ha kawei naki jingïakhun Pre-Quarter final jong ka Pool 3 ha ka sngi Saitjaiñ ha madan First Ground-SSA Stadium, Polo.
Ha kawei pat ka jingïalehkai jong kane ka sngi la sakhi ïa ka Mawphlang SC kaba la pynneh ïa ka jingkyrmen jong ka ban ïohrung sha ka quarter final da kaba jop 1-0 kol ïa ka Lumpyngngad SC ha ka Pool 4.
Ka Mawkasiang ka la pynthikna ïa ka jingïohrung lyngba ki kol na u Kyrmenskhem Mukhim (7′), Hame-dao Nongtdu (19′) bad u Lamshai Jana (55′). Ka Mawnianglah ka la ïoh ban pynphai shi kol lyngba u Elnathan Teinam Lyngdoh (21′).
Kumta ka Mawkasiang ka la ïoh ban kamai 6 point na ka Pool 3, katba ka Mawnianglah bad ka Lummawbah baroh ar tylli kim pat shym la kamai point. Ka jingïakhun hapdeng kine ki arliang mamla ha ka 23 tarik Naitung kan rai kano ka kynhun ban jam shakhmat sha ka quarter final.
Nangta ka jingïalehkai kaba bud ka shi kol jong u Fedrick Wankhar ha ka minit kaba 80 ka la biang pura ïa ka Mawphlang ban khur ïa ki 3 point kiba kongsan hadien ba ka la pyndep baroh ar tylli ki jingïalehkai pre quarter final na ka Pool 4.
Watla ka Lumpyngngad kam pat ïoh ban kamai point hynrei ka dang hap ban aireng pyrshah ïa ka Laitkroh (kaba la jop ïa ka Mawphlang da 3-2 kol) ha ka jingïalehkai ba khatduh jong ka Pool 4. Te kane kamut ba baroh lai tylli ki kynhun ki lah ban pynkut da mar 3 point lada jia ba ka Lumpyngngad ka la jop ïa ka jingïalehkai ba khatduh.
Ki jingïalehkai pre quarter final kin bteng biang ha ka sngi Ba-ar, ha kaba ka Laitlulong kan ïakhun pyrshah ïa ka Laitumkhrah ha ka por 1 baje mynsngi na ka Pool 1, nangta ka Lapalang pyrshah ïa ka Mawlynrei ha ka por 4 baje janmiet na ka Pool 2.
