Shillong, Naitung 19: Ka resol jong kawei naki jingïalehkai ha ka Third Division 2025 ba la pynïaid da ka Shillong Sports Association ha madan First Ground-SSA Stadium, Polo, hapdeng ka Sanmer SC bad ka Pomlakrai SC ka la kut ha ka jingïakhaid, ha kaba baroh arliang kim shym la lah ban pynkhihjar.
Kumta baroh ar kynhun jong ka Group A ki la ïasam mar shi point. Kane ka dei ka jingïakhaid kaba ar sien ïa baroh arliang, kaba mut ba baroh ar ki la kamai mynta 2 point.
Ka prokram ïalehkai ha kane ka sngi Nyngkong ki long; ka Rynjah SC pyrshah ïa ka Umrynjah SC, ha ka por 10 shiteng mynstep, nangta ka Imson kan ïakhun pyrshah ïa ka Lumparing, ha ka por 1 baje shiteng mynsngi, bad khatduh ka Iaitylli pyrshah ïa ka Gorkha Association, ha ka por 4 baje nohphai sngi.
