SHILLONG, Naitung 20: U Bah Pynshai Mawrie ha ka 19 tarik Naitung, 2025 (sngi Saitjaiñ) u la pynbna ïa ka jingwanrah ïa kawei na ki synjuk ïalehkai ba thymmai kaba la tip da ka Kudo Association of Meghalaya, ha kaba ka Kudo International Federation of India [KIFI] ka la thung ïa u Bah Pynshai kum u President.
Ka jingshah thung jong u Pynshai Mawrie ban long u President jong kane ka synjuk ka dei hadien ba u la lah ban pyndep ïa ka exam kaba la long ha u bnai Jymmang.
Haba ïakren sha ki lad pathai khubor u Bah Pynshai u la ïathuh ba kane ka synjuk jong ka jingïalehkai Kudo ka dang dei kaba thymmai hapoh ka Jylla Meghalaya, bad ka dei ka jingïalehkai kaba la ithuh da ka Kudo International Federation of India.
U la ïathuh ba watla ka dang dei ka synjuk kaba thymmai hynrei ki la don kumba 50 ngut ki khynnah kiba la pynrung kyrteng ïalade ha kaba bun naki ki dei na East Khasi Hills, da kaba bynrap ba ki la don katto katne ngut ki khynnah kiba la shim bynta ruh ha ka Selection Trial ha kaba 16 ngut ki la shah jied ban ïashim bynta ha ka rynsan ïakop jong ka Akshay Kumar Kudo Tournament 2025.
Shuh shuh u Bah Bah Pynshai Mawrie u la pynpaw ruh ïa ka jingthmu ban pynlong ïa ka 1st State Level mynta u snem.
U Bah Pynshai Mawrie u la ong ruh ba namar ba ka dang dei ka synjuk kaba dang shu wanrah thymmai ha ka jylla, kam pat shym la ïohlad ban pynïasoh ïalade hapoh ka shatri jong ka Meghalaya State Olympic Association [MSOA], hynrei kum u President u la bynrap ba un sa phah da ka shithi ban pynshai bad ban ïoh ka jingithuh kaba pura na ka MSOA kumjuh ruh na ka tnad ïalehkai jong ka Sorkar Jylla Meghalaya.
ïa mynta ki la don kumba 4 tylli ki District kiba la pynïasoh bad kane ka Association bad kumba 50 ne 60 ngut ki khynnah ïalehkai.
