Jowai, Naitung 15: Ka Hynñiewtrep Integrated Territorial Organisation (HITO) ha ka sngi Baar hapoh ka jingïalam u General Secretary Seng Kmie u Bah Wanbun N Dkhar, u President ka East Jaiñtia Hills District u bah Deibormi Rymbai bad u co-founder u bah Lawyerson War ki la leit ban ujor da ka ejahar pyrshah ïa u Bah Sevenborn Tang ha PS Khliehriat uba kam ïalade ba u dei u lessee lane u agent jong ka ka Jaiñtia Hills Autonomous District Council Forest Department ban pynïaid ïaki Forest Check point lane Forest Revenue Station.
Ka seng lyngba ki jubab ba ka ïoh na ka Right to Information act 2005 naka office jong u Chief Forest Officer JHADC kala jubab shai ba ka JHADC kam shem la thung ne buh ïakino kino ki agent ban pynïaid ïaki check point jong ka hynrei ïakane la leh daka jingïasuh buit jong ki katto katne ki MDC ka liang shynshar ban ïoh myntoi ïalade hynrei ym ïaka council baroh kawei.
U Bah Wanbun N Dkhar ula ong ba kane ka jingbudein jong ka seng ka long hadein bala ïohi ïaka jingkyrduh bad jinghiran pisa ka Council wat tang ban siew tulop ïaki nongtrei ruh ka shem jingeh, hynrei kane ka jinglum pisa be aiñ haki khyrdop ka JHADC kadei tang ban pynmyntoi ïaki katto katne ki MDC ban kane ka buh jingma ïaka lawei jong ka Council bad ha kaba ïadei bad kane ka jingujor ejahar pyrshah ïa u Sevenborn Tang, ka seng kala dawa ba ula dei ban pynphai noh ïaka pisa kaba ula ïoh lum lyngba kitei ki khyrdop naduh u Nohprah 2024 haduh u Jylliew 2025 la pynkut ka kyrwoh.
