Jurip u MLA ïaka skul Umpathaw Mathan LP School ryngkat ki jingïarap

Nongpoh, Naitung 14: U MLA ka Nongpoh u Bah Mayral Born Syiem mynta ka sngi u la leit ban jurip ïakawei ka skul nongkyndong haka shnong Umpathaw kaba la tip kum ka Umpathaw Mathan LP School ban dang pynbha ïa katei ka skul bad khamtam ba kan dang lah ban ai ka jingshakri kaba paka ïaki khynnah pule.

Katei ka skul ka dei kawei naki skul kaba la rim tam ha katei ka shnong kaba dang don ruh shibun ki jingduna bad ki jingdonkam bad kum u MLA hadien ka jingjurip u la aiti ruh ïaki jingïarap kiba donkam hakhmat eh jong katei ka skul kum ka tin sop iing ryngkat kiwei kiwei ki jingïarap ba kongsan ki ban sa pynpoi ha kine ki khyndiat sngi.

Ha katei ka sngi nalor u MLA la don lang ruh da u Bah B Khymdeit Rangbah Shnong, u ba long ruh kum u Chairman ka School Managing Committee, ka kong Larihun Suleiñ Head Teacher ka Umpathaw Mathan LP School ki dkhot komiti shnong, ki kmie ki kpa lem bad ki khynnah skul.