Lyngba ka jingïasam ïa ki kolshor kane ka thaiñ, la pynkut noh ïa ka tamasa ka NENSSYF

Shillong, Naitung 13: Ka North East NSS Youth Festival (NENSSYF) 2025, ba la pynlong da ka Union Christian College, Umiam Khwan, ka la kut noh hadien ka jingpynlong ïa ki prokram bapher bapher ha kine ki 5 sngi ba la leit noh, lyngba ki prokram ha ka ktien bad ka jingïasam ïa ki kolshor.
Ka phang jong kane ka tamasa ka dei “One North East, One Spirit,” ha kaba ka la wanrah lang ïa ki samla pule na kylleng ka thaiñ ban kyntiew ïa ka jingïalong kawei, nangta ki kam ai jingshakri bad ki jingpyni ïa la ki jong ki kolshor.
Kane ka tamasa ka la pyni ïa ki jingtbit ki samla pule ha ki prokram bapher bapher ba kynthup ha ka beatboxing, ki jingshad na la tynrai, bad ki musical duet, kaba pyni ruh ïa ka jingriewspah ka hiar pateng ka kolshor jong kane ka thaiñ shatei lammihngi.
Kane ka tamasa ka kynthup ïa ki jingialang halor ki kam pynsngewthuh shaphang ka sawdong sawkun, ki kam runar bad ki samla, ka jingïashim bynta lyngba ki kam digital, bad ka jingkyntiew ki kam pynsngewthuh halor ki kam kiba kongsan.
Na ka liang kiba trei monsngewbha ki la shim bynta ha ki jingshah hikai ban ïada ïalade, ban pynkupbor ha ki sap ïada bapher bapher.
Ha ka rynsan jingïasyllok halor ka jingkyrduh kam kyrduh jam ki samla ka la wanrah lang ïa ki riewshemphang na ki jaka bapher bapher kiba la batai halor ki kam kiba kongsan jong ka imlang sahlang.
Ha ka sngi kaba kut ki la don ki jingkren na ki heh ki haiñ kiba la shah khot sngewbha kiba kynthup ïa D. Carthigueane, Regional Director ka NSS, bad u Bah F. Rumnong, NSS State Nodal Officer.
La sam ruh ïa ki syrnot sha ki Programme Officer na ki college kiba la ïashim bynta, bad ïa ka prokram la pynkut da ki kyntien ai khublei bad ka jingrwai ïa ka National Anthem.
Kane ka tamasa kaba 5 sngi ka la wanrah ka rynsan jong ka jingïasam ki jingnang jingtip, ka jingpyni ïa ki kolshor, ka jingdonkam ban pynkupbor ïa ki samla bad ka jingdonkam ka jingïalong kawei ha kine ki thaiñ.
Katba ki volunteer ki dang leit phai sha la ki jong ki jylla, ki la rah lang ruh bad ki ïa ki jingai jingshakri kiba shongdor ba la sam da ka NSS, kum ka jinglong discipline, bad ka jingïasohlang hapoh ka ri da kaba pynpaw ka jingangnud ban tei ïa ka imlang sahlang bad kumjuh ruh ïa ka jingim ki samla.