Sbak la khang ïa ki tiar song jingbam plastik ha Nan Polok, ïaroh ki nongjngohkai pyrthei

Shillong, Naitung 13 : Ka jingkhang jong ka Nan Polok ban rah ïa ki jingbam ba song plastik shapoh ka jaka jngohkai, ka la pynlong ïa ki nongjngohkai na shabar jylla ban ai ka jingïaroh kaba khraw ïa ki bor pynïaid.
Na ka liang ki nongthoh khubor haba ïoh ban ïa kren bad ki katto katne ki nongwan kai, ki la pynpaw ba kane ka sienjam ka ïahap bha khamtam haba ka jaka jngohkai kadei kaba khuid.
“Ban tehlakam ïa ki jaboh plastik donkam ban khang naduh tynrai kumba ki leh mynne na jaka rung,” ong kawei ka longkmie na Assam kaba wankai pyngad ba ki khun sha Shillong.
Ka la ïathuh ruh ba ki jaka jngohkai kum ha Nan Polok lada ym lah ban tehlakam ïa ki jaboh plastik naduh tynrai kan buh jingeh haduh katta katta ban pynkhuid ïa ka man ka sngi.
“La bun tylli ki jaka jngohkai kiba nga la wan nga ïohi ba ki jaboh plastik ki dei ki jaboh kiba isaitmet bha kiba pynduh noh ïa ka jingitynnad jong kano kano ka jaka jngohkai pyrthei. Kumta nga sngew ban ïaroh ïa kane ka jingpyrshan jong ka Nan Polok,” ka la ong.
Uwei pat u rangbah ba donlang hajan u la knieh ktien lang da kaba ong ba ki jaka kum ka Nan Polok lada ki bor pynïaid kim shimkhïa ban khanglad ïa ki jaboh plastik, ka jingitynnad jong ki sawdong sawkun kan sa duh lut namar kin sa per da ki jaboh plastik hapoh ki sla um bad wat ki jaka shongkai ruh kin sa satah da ki jaboh.
“Ïa ki jaboh plastik tang shu ailad, kine kin sa kharoi thik kumba long ki pyrjong. Ngi ïaroh ïa ki bor pynïaid kiba lah ban shim ïa kum kine ki jingpyrshang ban ïakhun ïa ki plastik,” u la ong.
Haba ïakren pat bad shi kynhun ki samla kiba wankai, ki la ong ba nyngkong ki lyngoh ba na khyrdop kim shah ban rah ïa ki bilor um plastik bad ki umsoh shapoh. Hynrei dei ynda la pynshai ba ki ruh ki sngew ïahap. “Ngi ruh ngi mynjur ba lada shah ban rah ïa ki bilor um plastik lane ki bilor umsoh bun kin bret pathar beit ha ki madan madiah ym ha ki jaka bret ba la buh. Kum ngi sngew ïahap ba la bha ban ym shah,” ki la ong.
La ïohi ruh ba ha ka por ba ki bor pynïaid ki la pynshai ba la khang ïa ki nongwan kai ba kin rah ïa ki bilor um plastik ne ki bilor umsoh plastik shapoh, ym don satia kiba pyneh ne khnium. Kaba kham itynnad ka long ba kine ki bor ba dei peit ki pynshai ba ym khang satia ïa kito kiba rah um ha ki jingdieng bym dei plastik lane ïa ki jingbam ba song ha ki jingsong bym dei plastik.
Kumba ong iwei i longkmie, “Lada baroh ki jaka jngohkai pyrthei ki pyrkhing ïa ki song jingbam plastik kumba leh ha Nan Polok ka jingjaboh plastik kan ym ïoh jaka bad kane kan pynsuk ruh ïa ki nongtrei ha kine ki jaka ba kin lah ban pynitynnad shuh shuh ïa ka jaka jngohkai ha ka jaka ban pynlut por ban leit tam ïa ki jaboh plastik.”
Lah ban kdew hangne ba ka sorkar jylla ka la pynbna ba ka jingitynnad shuh shuh ïa ka Nan Polok (Ward’s Lake) kum ka pdeng jong ka jaka jngohkai pyrthei kan sa sdang noh shen da kaba sdang shwa ban pynkhuid lut ïa ka nan baroh kawei.
Kumba la ïathuh da u Myntri ka tnad Tourism ka sorkar jylla, Bah Paul Lyngdoh u la ïathuh ba la mang haduh 7.03 klur tyngka na ka bynta ban pynitynnad ïa ka Nan Polok.