Shillong, Naitung 06: Ka lympung ïalehkai State Level Subroto Cup 2025 ka la poi sha kaba kut ha ka 05 tarik Naitung, 2024 sngi Saitjaiñ, ha kaba ki kynhun jong ka Ri-Bhoi District ki la ïohrah ïa ka burom lahduh ha ka kyrdan ïalehkai U-15 jong ki khynnah shynrang (U-15 Boys) bad ha ka U-17 jong ki samla lud kynthei (U-17 Girls), katba ka kynhun na West Jaintia Hills ka la rah ha ka kyrdan U-17 jong ki shynrang (U-17 boys) hadien ba ki la jop ïa la ki jong ki jingïakhun phainal kaba la long ha madan First Ground-SSA Stadium, ha Polo.
Kane ka lympung kaba wanrah lang ïa ki kynhun ba kynsai tam na baroh 12 tylli ki District jong ka jylla Meghalaya, la pynïaid da ka tnad ïalehkai jong ka Jylla, bad shuwa ka semi final bad ka final la pynlong ïa ki jingïalehkai ha lai tylli ki jaka ha nongbah Shillong, kata ha SAI Centre ha NEHU (na bynta ki U-15 boy), ka madan First Ground jong ka SSA Stadium ha Polo (na bynta ki U-17 boy) bad ha Mawlai Madan Heh (na bynta ki U-17 Girl).
Ka jingïakhun phainal kaba nyngkong la sakhi ïa ka Mawtneng Upper Primary & Secondary School (Ri-Bhoi) bad ka Government Boys Higher Secondary School (WJH) kiba la shah pynbor ban jam sha ka tie breaker ban rai ïa ka lahduh ha ka kyrdan U-15 Boys hadien ba ym shym la don ba lah thep ha ka por ba la buh bad ruh ha ka extra time. Ha ka Tie breaker ka Mawtneng U.P & SEC. School ka la jop da 5-3.
Ka phainal kaba bud la ïohi ïa ki thei ïalehkai jong ka Nongjri Presbyterian Secondary School (Ri-Bhoi) kiba la wanphai nadien ban pynliem ïa ka Tyrsad HSS da 2-1 kol. Ka Tyrsad HSS ka la ïoh ban lamkhmat ïa ka jingïalehkai ha ka minit kaba 16 lyngba ka penalty kaba la pynrung da ka Balabet Khongsit. Hynrei tang hadien 3 minit ka Nongjri Presbyterian ka la jubab da kaba pynïakhaid lyngba ka Paleimon L Lyngkhoi (19’min) shuwa ba ka Daphi Syngkli kan pynkhih ïa ka kol pynjop ha ka minit kaba 54.
Ka jingjop jong kine ki ar tylli ki kynhun ka la ai jingkyrmen ïa ka Ri-Bhoi ban pyndep biang sa shi sien ïa ka jingjop kaba pura ha baroh lai tylli ki kyrdan, hynrei phewse, kane kam shym la lah ban urlong mynta u snem hadien ba ka kynhun ïalehkai U-17 jong ki shynrang ka la shah rem noh ha ka North Liberty HSS (WJH) da tang 1-0 kol. Ha u snem ba ladep ki kynhun na Ri-Bhoi ki la rah ïa baroh lai tylli ki burom lahduh jong ka state-level.
Ka phainal kaba khatduh hapdeng ka Nongjri Presbyterian pyrshah ïa ka North Liberty ka la long kaba jur bha, ha kaba baroh arliang ki la aiti lut ban thaw ïa ki lad ki kabu ba paka khnang ban ïoh pynkhihjar. Watla bun tylli ki jingpyrshang pynkhihjar ki la wan na baroh arliang hynrei ym shym la don satia ba lah ban pynïakhlad ïa ki.
Ka la shimpor haduh ka extra time shuwa ba u Lastborn Suting (84’minit) un pynkhih ïa ka namtam. Ka bol pashat kaba thikna na ka free kick ka la plielad ïa u Lastborn ban thep ïa katei ka kol kaba kongsan da kaba shu pyndei tiak da ka khlieh ïa ka bol.
Nalor ki khusnam lahduh sha ki kynhun la ïoh ruh ban sam khusnam sha ki nongïalehkai ba kynsai, ha kaba u Arki Bauni Jalong jong ka Mawtneng U.P & Sec. School (Ri-Bhoi) u la khur ïa ka Best U-15 Boys Goalkeeper, katba u Pyntngen Nongtri (Ri-Bhoi) u la khur ïa ka U-15 Boys Player of the Tournament.
ïa ka nam Best Goalkeeper jong ki kynthei la khur da ka Rikyntiew Diengdoh [Nongjri Presbyterian-Ri Bhoi], katba ka Daphi Syngkli ka la khur ïa ka nam Player of the Tournament. U Namebanlam Nongkseh [Nongjri Presbyterian-Ri Bhoi] u la khur ïa ka U-17-Boys Best Goalkeeper, katba ïa ka Player of the Tournament la ïoh da u Iaisanlang Dohling [North Liberty-WJH].
Ki riew rangbah kiba la wan sakhi ïa kane ka phainal ki kynthup ïa u Bah Charles Marngar-MLA ka Mawhati, u u Bah Hamletson Dohling- President ka Meghalaya Football Association bad u Bah John F Kharshiing- Working President ka Meghalaya State Olympic Association, bad kiwei kiwei.
