Ym lah ban ong “EM” ïa u drok tang marwei, hynrei da ka jingïatreilang ngin lah ban pynduh jait: DC

Mawkyrwat, Jylliew, 27: Ka ophis District Social Welfare Office, South West Khasi Hills District ryngkat ka jingïatreilang bad ka ophis Deputy Commissioner ka South West Khasi Hills District ha ka sngi Palei, ki la rakhe ïa ka International Day Against Drug Abuse and Illicit Trafficking 2025 halor ka phang, “The Evidence is Clear: Invest in Prevention Break the Cycle”.
Ki nongkren ha kane ka sngi ki la kyntu bad ai mynsiem ym tang ïa ki paidbah nongshong shnong, ki khynnah skul, ki nonghikai, ki nongialam shnong, ki kynhun treimon sngewbha ne ki sengbhalang ba kin ieng ialeh pyrshah ia u drok hynrei wat ia ki ophisar kiba kynthup ïa ka tnad pulit ba kin don ka jingïatreilang khnang ba yn lah ban rat dyngkhong ïa ki jingsniew hapoh ka South West Khasi Hills District.
U Deputy Commissioner ka South West Khasi Hills District B. Mawlong, u la long u kongsan ha ryngkat ka jingïadonlang u bah B. Jyrwa, Superintendent of Police, u bah F.B. Basan, Additional Deputy Commissioner, ka kong S. Majaw, Meghalaya Judicial Service, Chief Judicial Magistrate cum Secretary jong ka DLSA, South West Khasi Hills District, u bah E. Tariang, District Social Welfare Officer, South West Khasi Hills District, ki myntri shnong, ki nonghikai, ki khynnah skul, ki seng samla shnong, ki khynnah skul ka Nativity Higher Secondary School, Mawkyrwat bad ki dkhot ka Life Care Foundation.
Ha kane ka sngi sam a ki khusnam sha ki nongjop ha ki jingïalehkai ha ka Futsal ba la jop da ka Sohkhyllam Sports Club, ha ka Basketball la rah da ka 7X1 Airborne, bad ha ka Marathon ha kaba ïa kane ka Marathon kaba dei 10 km Run (Male & Female) la pynlong da ka ophis jong u Superintendent jong ki Pulit ka South West Khasi Hills District ha ryngkat ka jingïatreilang bad ka ophis jong u District Sports Officer, South West Khasi Hills District na Phyllaw jong ka Circuit House, Laitlawsang – Jakrem – Sakwang – Pyndensakwang – Lad District Court – Phyllaw jong ka Circuit House bad ki don baroh kumba 100 ngut ei ei ki nongmareh kiba la wan ïashimbynta.
Ki nongjop ki long: u Roman Kharbani, u Badonsing Tham bad u Swonding Mawlong jong ki shynrang bad ki nongjop jong ki kynthei pat ki long ka Juliana Wanniang, ka Snora Lyngkhoi bad ka Ibameri Shullai kine ki dei ki nongjop ha ka karta ba 50 snem shajrong. Nangta ki nongjop ha ka open category ki long u Hepstarly Lyngkhoi, u Hesebenson Marweiñ bad u Iwelljohn Ramsiej bad jong ki kynthei pat dei ka Lyntijingkyrmen Kharjahrin, ka Daplin Wahlang bad ka Bandasharai Marweiñ.