Jowai, Jylliew, 04: Ka Hynñiewtrep Integrated Territorial Organisation (HITO) Jowai Circle ha ka sngi Baar ka aiti da ka dorkhas ha u Deputy Commissioner ka West Jaiñtia Hills District da kaba kyrpad ban pynmih shuh ïa ki kam ba dang lait ha ki tnat treikam bapher bapher hapoh ka District.
Ka seing ka la ong katkum ka jingpynshai u DC hadien ka jingïalang bad ki ophisar jong ki tnad sorkar la lap ba ki don 255 tylli ki kam ba lait, hynrei ha ka jingwad jubab lyngba ka RTI ha ki snem ba la dep ka seng ka la lap ba ka don ka jingïapher bak la bak bad haduh mynta ki dang bun ki kam ba lait hapoh ka District kaba la kot sha ka 400 tam ha ka DSC, la kynnoh ka seng.
Ka seng ka la pynsngew bad kubur ruh ïa ka jingïapher hapdeng ka Meghalaya Public Service Commission (MPSC) bad ka District Selection Committee (DSC).
Ka seng ka kwah ba ka rukom pynmih ïa ki kam ba lait hapoh ka District kan long kaba khuid bad kaba suba, khnang ba ki khun samla kin ïoh ka lad ban ïakhun ïa kino kino ki kam ha ka lynti kaba dei.
Ha kajuh ka por ka seng ka kyntu ïa u DC ban pynbna noh ïa kiwei de ki kam ba lait haki tnad treikam kiba don hapoh ka District, khnang ban kan long kaba khuid ba suba bad ban ïoh ka jingshañiah.
Ka seng ka khot lang ïa ka jingïasnohkti jong baroh lang, da kaba ong kane ka jingkyntu ïa ka ophis jong u DC ka long kum ka jingïatreilang na ka bynta ka bha ka miat.
