33 snem ïaid lynti ka Ri Bhoi District, bun ki jingkylla bad ki jingduna, kham myntoi ha ki surok

Cornelius Laloo

Nongpoh, Jymmang 03: Ka Ri Bhoi District ka dei kawei na ka District kaba kham paw haka jylla bad ka daw ka long ba ka dei ka khyrdop ban rung sha ka jylla Meghalaya bad ka jingdon ruh ka surok National Highway kaba pynïasoh ym tang ïa ka Assam bad Meghalaya, hynrei ka surok kaba pynïasoh sha bun tylli ki jylla hapoh ki jylla shatei lam Mihngi ka ri India.

Kum ban pynkynmaw, ka Ri Bhoi District ka la ïoh ïa ka District kaba pura ha ka 4 tarik u Jylliew 1992 ha kaba ka la kiew kyrdan na ka Civil Sub Division shaka kyrdan kum ka District ba para. Ka Ri Bhoi District ka la ïaid lynti mynta la 33 tylli ki snem naduh ba la ïoh kum kata ka district ba pura bad ha kitei ki 33 tylli ki snem lah ban ong ba la don shibun ki jingkylla bad ym lah ruh ban len ba dang don ruh ki jingduna ha kiba bun ki liang ba ka sorkar ka hap ban phai khmat sha Ri Bhoi bad kawei na kaba hakhmat eh ka dei ka jingdonkam ban wan rah noh ïa ka Government College, ha kaba haduh mynta dang don tang ki College ba la pynïaid da ki riew shimet.

La jin ba don ka Government College, kane kan ïarap ym tang ban kyntiew ïa ka pule ka puthi bad ka jingnang jingstad ki samla pule na Ri Bhoi, hynrei kan ïarap ruh shibun ïa ki samla ba wan na ki longïing baduk ba kin lah ban bteng sha ki kyrdan ba shaneng, namar lada ïa nujor ka jinglut jingsep jong ka jingpule ka ïapher bak-ly-bak ha ka government college bad ha ki college ba pynïaid da ki riew shimet ba ka jingsiew ka heh ha ki college ba pynïaid da ki riew shimet ban ïa ka college ba pynïaid da ka sorkar.

Tiak, khlem da kdew ïa kiwei kiwei ki jingduna ne ki jingkylla hapoh ka 33 snem ka jingïaid lynti bad ngin shu ïa kren tang ïa ki lynti ki synkien, la ïohi ba ka Ri Bhoi ka kylla shibun haba ïa nujor bad ki 33 snem ba la leit.

Haba phai sha ki surok, kaba long u budlum ka ïoh ka kot, ka Ri Bhoi District mynta ka la don ïa ka surok 4-lane kaba la pynsuk ïa ki paidbah ha ka leit ka wan bad khamtam ba ka long kata ka khyrdop jong ka jylla Meghalaya bad sha kiwei ki jylla shatei lam mihngi ka ri India.

Kiwei ki surok ba la pynsuk bad kiba kham kongsan (Major road) ïa ki paidbah ka dei ka surok Mairang sha Rani, ka surok Umrit sha Umling, ka surok Baridua Killing sha Umsen, ka surok Bhoirymbong sha Thadrang, ka surok na Umsning sha Sohnidan  bad kiba sah mynta ki kyntup sa tang ka surok na Sohnidan sha Umsiang, ka surok na Nongpoh-Umden-Sonapur bad ruh ka surok Eastern By-pass ha kaba ki la don ha ka jingpynkhreh ban pynbha ne siang rong kaba long shisha ka jingmyntoi na ka bynta ki paidbah ka Ri Bhoi bad ka jylla hi baroh kawei.

Kine ki long katto katne kiba kwah ban pynpaw, bad dang bun ruh kiba ka Ri Bhoi ki la kiew ha baroh ki liang bad ba dang donkam ruh ban dang kyntiew bad tang ha kine ki 33 snem ba ka Ri Bhoi ka la ïaid lynti naduh ba ka la ïoh ïa ka District ba pura, ki la don shibun ki jingkylla, la ka long ha ka umbam ka umdoh, ka koit ka khiah, ka pule ka puthi bad kiwei kiwei de.

Kum ban pynkynmaw, kyrpang ïa ki paidbah ka Ri Bhoi bad ki paidbah ka jylla hi baroh kawei, ka Ri Bhoi District ka kynjoh 33 snem ba la ïoh ïa la ka District ha ka 4 tarik u Jylliew 1992 bad ka 4 Tarik u Jylliew man la u snem la ju tip ruh kum kata ka ‘Ri Bhoi Day’ ba kane ka District ka la ïoh ïa ka District kaba pura ka ban dap 33 snem ha ka 4 tarik u Jylliew 2025.