Kam dei ba ki hap, dei ka jingshah pynïap, aiti tohkit sha ka CBI, dawa ki bahaïing ki shijur

Shillong, Jylliew 3 : Ki bahaïing hasem jong ki shikurim na Indore, ha ka sngi Ba-ar, ki la dawa ban phah tohkit ha ka Central Bureau of Investigation (CBI) halor ka jingiap u Raja Raghuvanshi, ka met bala kem pyut bala ïoh tam na ka riat bah ha kshaid Weisawdong hadien ba ula jah rngai bad la ka kurim ha ka thaiï Sohra la kumba 9 sngi ei ei.
“Ngi dawa jur ban tohkit da ka CBI ïa kane ka jingjia namar kam dei ka jinghap shapoh riat hynrei ka dei ka jingshah pyniap” ong u Vipin Raghuvanshi, uba dei u hynmen jong u Raja Raghuvanshi, haba ïakren bad ki nongthoh khubor ha NEIGRIHMS.
“Kane ka long namar ba ki Pulit ka Jylla kim mynjur satia ba ka don ka jingleh sniew hynrei lada kam don ka jingleh sniew balei pat ba lap ïa ka metiap?. ïa ka met u Raja la lap 25 kilometer na ka jaka ba pynïeng ïa ka scooty ba u shim wai. Kumta, ngi suba jur ba ka don ka jingrahbor bad ïalam ïa ki sha kshaid Weisawdong” ula ong haba ap ïa ka jingleh post mortem ba kan dep hashuwa ban rah noh ïa ka metiap jong la u para sha Indore.
U Vipin ula ong ruh ba kam lah ban long ba u para jong u bad ka kurim kin ïa nohiap hi namar ka jaka-kaba lap ïa ka metiap jong u, ka dei kaba don ïa ka jingker kaba biang.Hynrei ula ong ba ki Pulit kim mynjur satia ïa ka jingkynnoh ki bahaïing ba ka dei ka kam rahbor, lute bad pyniap.
“Baroh arngut ki ïadeng ksiar. Artylli ki sati ksiar, u kynjri ksiar, u jingdeng ksiar, ka pla pisa, ki mobile phone ruh kila jah na ka met u Raja. Lada dei ka jingnohiap hi, baroh kine ki tiar kin ym jah satia” ong une u Hynmen.
Ki bahaïing kila ujor ïa ka jingjah rngai kine ki shikurim ha ka 23 tarik u Jymmang.
U Vipin ula kyntu ïa ki bor ka Sorkar ba kin pynthikna ha kaban wad ban wan ïalam im ïa ka hepkynsi Sonam Raghuvanshi.
Haba kylli, ula ong “Kam don satia kano kano ka jingïakynad hapdeng jong ki. Ki dang shu ïathoh ha ka 11 tarik Jymmang bad ki ïakmen bha baroh arngut”.