Shillong, Jylliew 3 : Ka Executive Committee ba ïalam da ka Voice of the People Party (VPP) ha Khasi Hills Autonomous District Council (KHADC) ka la weng kam noh ïa 13 ngut ki Nongtrei ba thymmai bad pyndam noh ïa ka hukum thungkam pura ïa ki 30 ngut ki nongtrei casual hadien ba la thung ïa ki khlem ka jingmang ïa ka kam (sanction post).
Haba pyntip ïa kane ha ka sngi Ba-ar, u Chief Executive Member (CEM) ka KHADC Bah Shemborlang Rynjah ula ong ba ïa kane ka rai la shim halor ka kaiphod bala aiti da ka Committee bala thung da ka Executive Committee ban pynbeit ryntih ïa ka jingtreikam jong ka Council.
Ula pyntip ba ka Committee, kaba la shong jingïalang haduh san sien, kala shong bishar ïa ka jingshakri ki nongtrei ka District Council bad ha kane ka jingbishar kam, la mih ka jingthungkam ïa ki 43 ngut ki nongtrei. Na kine, 13 ngut ki dei kiba dang shu thungkam thymmai bad 30 ngut ki dei kiba la thungkam pura hadien bala thung ia ki kum ki nongtrei Casual.
“Hadien bala bishar bha, ngi shem ba ka jingthungkam ia ki la leh khlem ka jingmang ïa ka kam” ong u Bah Rynjah haba bynrap “Haba pynshong nongrim ïa ka kaiphod bala aiti da ka Committee, ka EC kala rai ban pynsangeh noh ïa ka jingshakri ki 13 ngut ki nongtrei ba dang shu thung thymmai bad halor ki 30 ngut ki nongtrei Casual, kiba la shah thungkam pura, ngi la rai ban pynkylla biang ïa ka hukum thungkam pura ïa ki bad la shah ïa ki ba kin bteng ïa ka jingshakri kum ki nongtrei Casual”.
Kat kum ka jingong jong u, ki 13 ngut kiba dang shu thung thymmai, ki dei kiba la wan trei ha u bnai Naitung bad Nohprah 2024 kum ki constable ka Tnad Enoforcement, Peon, Mali, Cleaner bad kiwei kiwei.
Haba pynpaw ba ka KHADC kam don ïa ka pla tyngka kaba biang, u CEM ula ong ba ïa mynta, ki don palat 70 ngut ki nongtrei contract bad ka jingsiew tulop ïa ki la pynbeit na ka Administrative Charge ba 5% jong ki scheme bapher bapher.
Ka kynhun jong ki Nongtrei kiba shah ktah na kane ka jingpynkylla ïa ka hukum, kila leit ïakynduh ïa u CEM ban kyrpad \ïa u ba un pyrkhat biang sa shisien ïa kane ka rai.
Haba kylli, u CEM ula ïeng skhem ba ka EC kan ym pynkylla shuh ïa ka rai bala shim bad ong “Mynta, ka shong ha ki la ki dang kwah ban bteng ne sangeh noh kum ki nongtrei Casual”.
“Ngin dang bteng ruh ban leh eiei pyrshah ïa kito ki nongtrei bala thungkam khlem ka jingmang ïa ka kam” ula pynbna.
Nalor kane, u CEM ula ong ba ka Committee for Administrative Streamlining hapoh ka Council, kan sa shong bishar ruh \ïa ka jingdonkam ban pynkylla ïa ka service rules.
“Ngi la rai ruh ban thung ïa ka Recruitment Committee ban pynthikna ïa ka jingshai ha ka thungkam thungjam hapoh ka Council” ula bynrap.
