Shillong, Jymmang 30: U Lat ka jylla Meghalaya u CH Vijayashankar ha ka sngi Thohdieng u la pdiang sngewbha ïa ki dkhot jong ka Committee of Backward Classes and Minority ha Raj Bhavan, Shillong bad pynthikna ba ki kynhun ba sahdien bad ki rit paid kin ïoh ki jingpynleit jingmut ba biang ha baroh ki liang.
Kane ka jingwan jngoh ka long ka dak kaba kongsan jong ka jingïadei bad ka jingithuh ïa ki kam ba ratbah ba la leh da ka committee ha ka ban kyntiew ïa ka jingkynthup ha ka imlang sahlang, ka jingïalong ryngkat bad ka roi ka sam kaba ïaryngkat lang hapdeng ki kynhun.
Ïa ka jingïalang la pynlong ha ka jingïadonlang u AR Krishnamurthy, G.H. Srinivasa, u H.V. Venkatesh, Gururaj Shetty Gantihole, Channabasappa Chenni, i Katti Nikhil Umesh ki dkhot ka Karnataka Legislative Assembly bad Dr. Dhananjay Sarji S.R. dkhot ka Karnataka Legislative council
Kum ka dak ka jingburom bad pdiang sngewbha, u Lat ka jylla u la pynkup burom ïa baroh ki dkhot ka Committee da ki jingkup ryndang ba dei da ki jaiñ randia , kaba long ka dak jong ka kolshor ka Meghalaya haba pdiang sngewbha ïa ki. Na ka liang ki dkhot ki la pynpaw ka jingburom kaba khraw halor ka jingpynshlur bad kyrshan jong u Lat ka jylla halor kane ka jingthmu.
Ha ka jingïasyllok, kine ki nongmihkhmat ki la sam ïa ki jingtip bad ki kam ba ki la sdang da kaba pynpaw ruh halor ki kam kiba kongsan kum ha ka pule puthi, ka ïoh ka kot bad kiwei kiwei.
U Lat ka jylla u la pynthikna ïa ka jingkyrshan jong u halor ki kynhun kiba dang sahdien bad ki rit paid ha baroh ki liang.
La pynkut ïa ka jingïalang da kaba ïasam lang ïa ki jingai jingmut na ka bynta ki kam ba dang dei ban ïaid nangne shakhmat.
