Khliehriat, Jymmang 19: Halor ka jingjia kaba la jia hynnin ka miet ha company Star Cement ha Lumshnong, kaba la mih ka huri hura kaba jur bha bad ka la don ruh ka jingduh noh kawei ka mynsiem briew bad ka jingshah thang bad shah pynjulor ki trok jong ka company, na ka liang ka shnong Lumshnong, lyngba u Waheh Shnong bad na ka liang u heh jong ka company ki la pynpaw bad pynshai halor ka jingjia.
U ba ñiah ïa ka trok jong ka company u dei uba la tip kyrteng kum u bah Sailangmi Dkhar, uba na Khliehtyrshi bad uba ñiah ïa ka kali bolero pickup comper pat uba la khlad udei uba la tip kyrteng kum u Sniawbhalang Suchiang.
Na ka liang u Management Representative jong ka company Star Cement, u Devander Bansal u la ong ba “U ba ñiah ïa ka trok jong ka company bad uba ñiah ïa ka kali bolero comper pickup imat ki la don shwa ka jingiakajia naduh Wahiajer ha kaba uba ñiah ïa ka pickup u la beh thong ïa ka trok haduh company bad ynda poi ha ka gate-I jong ka company uba ñiah ïa ka kali pickup u la kiew halor ka trok bad snoh na ka bynta ba shakhmat, te kumta u la hap nalor ka trok katba ka trok ka dang ïaid, lehse, imat uba ñiah ïa ka trok pat u la sheptieng ne tip balei u la phet krad, hadien kane ki la wan poi sa ki paidbah, kiba haïing jong u ba khlad bad wan poi sa ki pulit bad nangta la rah noh ïa ka met sha hospital, te imat ki la don katto katne kiba la shim kabu halor kane ka jingjia ha kaba ki la pyrshang ban pynpait ïa ki ïit jong ki trok kiba ieng ha jaka ieng kali hapoh company bad thang ruh ïa ki trok jong ka company, te kane ka la wanrah ka jingsheptieng bad jingsyier ïa ki paidbah bad ïa baroh kiba don ha company bad wanrah ruh ka jingthut ka jingtreikam ha plant ruh” u la ong shuh shuh ba ki la don haduh 16 tylli ki trok kiba la shah thang bad haduh 25 tylli ki trok kiba shah pynjulor bad ong ruh ba ki pulit kin sa peit halor kane ka jingjia bad leh katkum ka aiñ.
Na ka liang u Waheh Shnong Lumshnong, u bah Monlang Ladong u la pynpaw ka jingsngew khia halor kane kaba la jia hynnin ka sngi namar ba la don uwei na ki nongshong shnong jong ka shnong Lumshnong, u (L) Sniawbhalang Suchiang uba dei uba ñiah ia ka kali pickup bolero comper u la shah ïuh ha ka trok jong ka company.
Kane ka pynsngewsih ïa ngi kum ka shnong bad ïa baroh hi, halor kane ka jingjia ngi dang buddien hi kum ka shnong bad ngi la don ka jingialang bad ka Star Cement bad kumjuh ruh bad ki pulit, kumba long mynta u ba ñiah ïa ka trok company u la phet krad bad ki pulit ki dang wad haduh mynta, ka kam ka dang ïaid shakhmat bad ngi khmihlynti ba ki pulit ruh kin dang peit halor kane khnang ba kaba kum kane kan nym jia shuh nangne shakhmat” ong u Waheh Shnong Lumshnong.
