Shillong, Jymmang 19: Kumba 5 ngut ki mynder ri Bangladeshi ki la shah kem noh na Byrnihat ha Ri Bhoi district ha ka step jong ka sngi Nyngkong.
Kine kiba la shah kem ki dei u Hafix Sigdah ba la 56 snem ka rta uba na Norail Jylla, Bangladesh, ka tnga jong u ka Ujala Begum ba la 35 snem ka rta bad lai ngut ki khun jong ki u Harim Sigdah, Lejaa Khatun bad Alina Khatun katba ki dang shong hapoh ka kali tourist bad ïa kine la pynsangeh bad lap ruh ba kim don ïa ki kot ki sla kiba biang bad la ïathuh ruh ba kane ka jinglap ïa ki kadei ruh shi bynta na ka jingtalasi ha Byrnihat, ïathuh ka khubor na ki pulit.
Katkum ka jingtohkit la lap ba kidei napoh ka ri Bangladesh kiba la wanrung beaiñ sha India ha u snem ba la dep bad kiba la thmu ruh ban leit phai sha ri Bangladesh beaiñ lyngba ka nongbah Shillong.
Na ka liang jong ki pulit ki la ïathuh ba la dep ban pynngat mukotduma ïa ki bad la dep ban leit ïalam sha ka Ïingkashari bad ka jingtohkit halor jong ki ka dang ïaid shakhmat.
