Shillong, Jymmang 19: Ka kynhun ki samla pule postgraduate kiba dang pule ïa ki Master ha Architecture ha University ka Michigan, USA, ki la leitjngoh ïa Raj Bhavan, Shillong ha ka sngi Nyngkong kum ka jingïaid lynti jong ki ha kane ka kam pule ha India Craft Futures Studio Program.
Na ka liang jong u Lat ka jylla u CH Vijayashankar, u la pdiang sngewbha ïa ki samla pule bad u la ïasyllok bad ki ha ka jingïalang kaba la long ha Raj Bhavan. Ki samla pule ki la batai bad ïathuh ruh halor kane ka jingwan jngoh jong ki sha kine ki thaiñ jong ka ri India, ha kaba ki la pynpaw ïa ka jingkmen ban ïohi ïa ki kolshor, ki kam rep kam riang ha Assam bad Meghalaya. Kine ki samla pule ki la leit ruh ban jngoh ïa ki Living Root Bridge, ka Law kyntang ha Mawphlang, ka Cherrapunjee (Sohra), ki krem ha Mawsynram, bad Mawlynnong kaba dei ka shnong kaba khuid tam ha Asia.
Na ka liang u Dr. B.D.R. Tiwari, IAS, Commissioner & Secretary sha u Lat ka jylla u la ïathuh halor ka jingdon jong ka ïing Raj Bhavan naduh ba la shah pynjulor ha u jumai ha ka snem 1897 bad kaba la ïeng kumba ka long mynta.
Ha kane ka jingwan jngoh la ïalam da ki dkhot ka Indian National Trust for Art and Cultural Heritage (INTACH) ha ryngkat bad ki technical expert bad ki designer na ka Meghalayan Age Limited.
La donlang ruh ki ophisar na ka tnat Architecture bad ki heh ophisar na Raj Bhavan bad kiwei kiwei.
Na ka liang u Lat u la aiti ruh da ki jaiñ Ryndia bad ki souvenir sha kine ki samla pule.
