Kum ki khynnah skul, trei shitom ryngkat ka jingïatreilang bad ki nonghikai : BDO

Mawkyrwat, Jymmang 12 : U Block Development Officer jong ka Mawkyrwat C&RD Block, u bah I. Lawrynniang, MCS kum u kongsan u la kynmaw ïa ki khynnah skul ba ki dei ban long kiba trei shitom ha ki jingpule ha ryngkat da ka jingïatrei lang bad ki nonghikai bad da kata kin kyrmen skhem ba kin sah mih ki khynnah skul kiba stad ki ban long kum ki khlur ba pynphyrnai ïa ka skul, ïa ka shnong bad ka thaiñ hi baroh kawei.
Ïa kitei ki jingkren u la pynkynmaw plie ïa ki lai tylli ki jingtei na ka bynta ka Rangthong Nongbah Government L.P. School ba la bei tyngka na ka skhim PMAAGY 2023 – ‘24 ha ka mang tyngka kaba T. 20 lak tyngka na ka bynta ban shna ïa ka ïing shet ja, ki jaka leit shabar ïa ka jingker kynroh bad ïa ka Gallery jong ka Rangthong Nongbah Government L.P. School.
Ym tangkata, u la pynkynmaw ruh ïa ki khynnah skul ki dei ruh ban don ka mynsiem jong ka jingïalong kawei, jingïalong shitylli bad don ka jingïa-ieit bad ñiewkor iwei ïa iwei pat. Namarkata, u don ruh ka jingkyrmen ba da ka jingdon jong kane ka ïing skul ym ban ki khynnah kin shu kut noh tang shiteng por hynrei na ka jingïoh jong ki ïa ka jingnang jingstad kin sa mih ruh ki khynnah skul kiba long shisha kita ki khlur jingshai ïa ka lawei jong ka shnong ka thaw bad ka dong ka thaiñ.
Ha kane ka sngi la sakhie ruh da ka jingïadonlang u bah kitborlang Nongrem uba dei u Myntri shnong Rangthong, u bah K. Mangniang, Assistant Engineering hapoh ka ophis jong u BDO, Mawkyrwat C&RD Block, ki nonghikai, ki khynnah skul bad ki ‘riew rangbah jong ka shnong Rangthong, South West Khasi Hills District.