Hiar jurip ki khun ki hajar bad ka Seng Samla Hima Langrin ïa ka karkhana coke ha Rajaju

Mawkyrwat, Risaw, 16: Ki Khun ki Hajar jong ka Hima Langrin ryngkat ka Seng Samla Hima Langrin, ki la hiar ban jurip ïa ka coke factory kaba don ha shnong Rajaju lynti ban leit sha Nongjri, South West Khasi Hills District kiba la ïeng kynjreng hapoh ka Hima Langrin khlem ka jingtip ki khun ki hajar ka hima Langrin.
Ha kane ka sngi jong ka jinghiar jurip ki khun ki hajar ka hima Langrin ki la pynpaw ka jingpyrshah jur ïa jingtei ïa kane ka coke factory bad ki la khang noh shipor ïa ki jingtreikam jong ki coke factory namar ba ki khun ki hajar ka hima ki la kynnoh ba u Syiem ka Hima Langrin u khlem ai jingtip sha ki khun ki hajar ka hima lane kam shym la don kano kano ka jingïalang paidbah ne ka public hearing shwa ban wanrah ïa kumne ki kharkhana kiba heh hapoh ka hima kiba lah ruh ban ktah ïa ka koit ka khiah jong u paidbah.
Ym tangkata. ki khun ki hajar lem ka Seng Samla Hima Langrin ki la pynpaw ka jingsngewkhia wat haba ki la pyrshang ban wat jingtip na kine ki tnad ba dei khmih ïa kum kine ki jait kam khamtam ïa ka tnad pollution, hynrei haduh mynta ki khlem ai jingtip ei ei. Kumta ki la kyntu jur ïa ki tnad sorkar kiba dei peit ïa kum kine ka bynta ba ki dei ban shim khia ha shwa ba kan don kano kano ka jingtei kaba lah ban ktah ïa u paidbah.
Ïa kane jingjurip la lam khmat da u Bah Blodingwell Langrin kum u President ka Seng Samla Hima Langrin ha ryngkat ka jingsynranlang u bah Faindness Syiemiong, u Andreas Lyngdoh lem bad ki paidbah.