Mawkyrwat, Ïaïong 23: Ka ophis jong u District Sports Officer (DSO) ka South West Khasi Hills District ryngkat ka jingïatreilang bad ka South West Khasi Hills Athletis Association (SWKHAA) mynta ka sngi ka la ïoh ban plie pyrda ïa ka lympung ïalehkai kaba la tip kum ka 11th South West Khasi Hills District Level Inter School Athletics Meet 2025 (SWKJDL-ISAM) ba la pynlong ha Rowell Lyngdoh Stadium, Mawlangwir, South West Khasi Hills District.
Ïa kane ka lympung ïalehkai jong ki khynnah yn pynïaleh ha ki lai sngi kata ha ka 23 haduh 25 tarik u Ïaïong, 2025 ha kaba ki don baroh 36 tylli ki skul bad 670 ngut ki khynnah kiba ïashimbynta ha ki jait jingïalehkai bapher bapher.
U bah F.B. Basan, MCS, Additional Deputy Commissioner, South West Khasi Hills District kum u kongsan bad u bah B. Jyrwa, MPS, Superintendent of Police ka South West Khasi Hills District kum u symbud kongsan. Haba ai jingkren kum u kongsan u la pynpaw ka jingkhublei na ka bynta baroh ki skul kiba la wan ïashimbynta ha kane ka lympung ïalehkai wat lada ka don ka jingpynthut jong u slap bad u lyoh.
Namarkata, u la ai mynsiem na ka bynta jong ki ba haba ki don ha kum kane ka lympung kim dei ban shu wan tang ban pyndep rukom hynrei ki dei ban don ïa ka thong ba kin rah ïa ka nam jop bad thmu ruh ban shu kut tang hapoh la ka jong ka distrik hynrei wat ban kiew na kawei ka kyrdan sha kawei pat.
Shuh shuh u la ai mynsiem ïa ki ba haba ki don ha kum kine ki jait lympung ki dei ruh ban pyni ïa ki sap ki phong jong ki ha ka rukom kaba dei khnang ba kin lait na kino kino ki jingmynsaw. “Long borabor ki khynnah kiba trei shitom ha ki liang baroh khnang ba kin nang kiew na kawei ka por sha kawei pat khamtam ha ki jingpule”, ong u bah Basan.
Kiwei de kiba ïa donlang ki kynthup ïa u bah Damang Syngkon, District Sports Officer ka South West Khasi Hills District, u bah H.S. Diengdoh, President ka South West Khasi Hills District Sports Association, u bah S.K. Budnah, President ka Mawlangwir Sports Club, ki nonghikai bad ki khynnah skul.
