Ban kyrshan ïa ki longïing baduk, 5000 ïing ai tin u MLA ka Nartiang Constituency

Jowai, Ïaïong, 20: U MLA ka Nartiang Constituency Bah Sniawbhalang Dhar uba long ruh u Symbud Myntri Rangbah ka Jylla kum shi bynta ban ai jingkyrshan ïa ki longïing baduk ba kyrduh hapoh ka constituency u la ai jingïarap da ki tin sop ïing sha ki 5000 tylli ki longïing kiba hap hapoh ka Nartiang constituency.
Ka jingsam ïa ki tin sop ïing la sdang ha ka 19 tarik mynta u bnai na ka shnong ha Wahïajer, West Jaiñtia Hills, Meghalaya.
Ha ba ai jingkren sha ki nongïoh bynta, shwa ban sam ïa ki tin sop ïing, u Bah Sniawbhalang Dhar u la ong ba ka jingsam ïa kine ki tin kan long sha baroh ki shnong jong ka Constituency bad mynta ka sngi ka dei tang ka jingsdang na ka shnong Wahïajer.
“Kum u MLA nga ladep sam tin la bunsien hapoh ka Constituency bad bun ki longïing kiba la ïoh bynta, hynrei ïa kine ki tin mynta nga la pynkhreh na ka bynta kito ki longïing kiba dang mih thymmai, kumjuh ruh ïa kito ki ba la donkam ban bujli ïa ki tin barim,” u la ong.
U la ong ruh ba u don ka jingkyrmen ba baroh ki longïing baduk kiba don hapoh ka Constituency kin ïoh bynta lut hapoh kane ka jingmang kaba 5000 tylli ki longïing bad u la pynpaw ka jingkyrmen ban yn ym don shuh ki longïing ki ban sop ïing da u phlang hapoh ka Constituency.
Ha kane ka sngi ki don kumba 600 spah tylli ki longïing kiba ïoh bynta na ka shnong Wahïajer bad ki shnong ba marjan.
Ïa ka jingsam ïa kine ki tin yn dang bteng ha ki sngi ba bud sha baroh ki shnong bad ki dong jong ka Constituency khnang ban pynsuk ïa ki paidbah, la pyntip u Bah Dhar.