Nongpoh, Jylliew 17: Kawei ka Trok Dumperkaba la shah tuh na Guwhati la ioh kurup biang mynta ka sngi na ka thaiñ Nongpoh, kaba dei hadien ar sngi ba ki runar ki la rong tuh na kawei ka Petrol Pump ha Guwahati.
Katkum ka tyllong khubor ba la ioh lum, la ïathuh ba ki snar nongtuh kali, ki la ïoh ban rong tuh ïa kawei ka trok dumper kaba don ïa u number AS 01 EC 3181 na ka jaka ba la pynieng ïa ka ha kawei ka petrol pump kaba don ha Biharbari, Guwahati ha ka step phyrngap jong 15 tarik u Jylliew bad ïa kane ka trok la dei trai ruh da u wei u briew ba la tip kyrteng kum u Dip Sharma na Guwahati.
La pyntip ruh ba u trai katei ka trok dumper tang mar ïa ïoh jingtip halor ka jingshah rong tuh ka kali jong u, u la leit ban ujor FIR ha Basistha Police Station, Assam bad na ka liang ki paralok jong u ruh ki la ïa trei shitom ban wad ïa kane ka kali,da kaba ki la leit leit ban tohkit ruh na ka khyrdop khrong khajna jong ka NHAI kaba don ha Pahammawleiñ Ri Bhoi District ha kaba ki la ïohi ba kane ka trok ka la jam shapoh Meghalaya lyngba kane ka khyrdop ha ka 16 tarik Jylliew 2022 ha ka por 4 baje eiei mynstep.
Shuh shuh la pyntip ruh ba na ka liang u trai katei ka trok dumper u la pyntip ruh sha ki bor pulit ka Meghalaya na Ri Bhoi District kiba la treishitom ban thwet ïa kane ka kali dumper bad dei haduh mynta ka sngi ha ka por shiteng sngi ki paralok utei u trai kali ki la ïohi ïa kane ka trok katba ka dang jam shakhmat ha ki thaiñ Nongpoh bad kthong ïa kane kali bad ïoh ban bat syndon pat hakhmat ka Petrol Pump hajan Saiden bad la pyntip marmar sha ki bor pulit ka Nongpoh Police Station.
Ka tyllong khubor ka la ïathuh ruh ba hadien ba la ïoh bat ïa kane ka trok dumper, la lap ba ki nongtuh ki la bujli ïa ka number jong kane ka kali da kaba pyndait da u number ML 12-1242 bad ki la pynduh lut ïa ki jingtah rong ne ki jingpynitynnad ïa aktei ka trok dup bad dei hadien ba la ioh bat ïa kane ka trok dumper la kem ruh ïa u dribar kane ka trok bad hadien kata la aiti noh sha ki bor pulit ka Assam ban leh ïa kaba donkam katkum ki kyndon jong ka aiñ, ong ka tyllong khubor ba la ioh lum.
