Mawkyrwat, Ïaïong 14: Ka lympung ïalehkai kynjatbol phainal ba la tip kum ka Super Division League 2024-2025 ba la pynïaid da ka Mawkyrwat District Sports Association (MDSA) hapoh madan Artificial Turt, Nonglang, South West Khasi Hills District ka la long da shisha ka jingïalehkai kaba shongshit bad kaba ïa khluit bha namar ka thong jong ki ka long ban rah ïa ka nam lah duh bad ban ïoh mihkhmat ha ka Meghalaya State League (MSL).
Haba phai ha ka jingïakhun kaba dei ha ka por 10 baje mynstep ka Wahsiej US&CC ka la shah rem noh ha ka Mariem Sports Club da 1 – 0 kol, katba ha ka jingïalehkai ha ka por 12 baje hapdeng ka Sakwang Sports Club bad ka Photjaud-Rangthong Sports Club ka la kut ha ka jingïakhaid da mar 1 kol.
Nangta, ha ka jingïalehkai kaba khadduh kaba dei ha ka por 2 baje nohphai sngi, ka Auro Sports Club ka la jop noh pyrshah ïa ka Moit-Hla Football Club da 2 – 1 kol.
Kumta ha kaba kut jong kine ki jingïakhun jong kitei ki kynhun, haba la kheiñ ïa ka jingïoh ïa ki poiñ ïa ka nam jop ha kane ka lympung ïalehkai jong ka Super Division la rah suk da ka Mawten Sports Club kaba shu ap khlem da don hapdeng jong ka jingïakhun.
Namarkata, haba kheiñ ha ka jingïoh poiñ jong ki kynhun ne ki sports club ka long: Ka Mawten SC bad ka Wahsiej US&CC ki la ïoh mar 11 poiñ, ka Marïem SC, ka Photjaud – Rangthong SC bad ka Moit-Hla FC ki la ïoh mar 10 poiñ katba ka Sakwang SC pat ka ïoh 9 poiñ.
Ki kynhun kiba hiar na ka Super Division ki dei ka Awro SC bad Mawkohphet SC.
Ha kane ka jingïalehkai la donlang nahduh u bah H.S. Diengdoh uba dei u President ka South West Khasi Hills District Sports Association kum u kongsan, u bah Y.G. Lyngdoh, Working President ka Mawkyrwat District Sports Association, ki nongkitkam jong ka Football Committee MDSA lem bad kiwei de kiba la shah khot sngewbha.
