Nongpoh, Ïaiong, 09: Ki paidbah nongleit nong wan, naduh ki khynnah pule, ki nongñiah kali, kiba beh trei bad khamtam kiba beh ban poi sha kad liengsuiñ mynta ka kynti ki la mad ïa ka jingsyrtok bad sngew jynjar shihsha namar ka jingdheng kali kaba jur ha surok bah NH-27 naduh Jorabat shaduh Khanapara.
La ïoh jingtip ruh tang mar ïa dap 1 baje nohphai sngi ba la sdang ban trei ka NHAI, ki kali ki la sahkut bad neh da ki phew kynta hajuh khlem khih bad katei ka jingdheng kali ka neh ruh haduh shiteng miet bad ïa kane ka jing dheng kali ha kane ka surok bah la sakhi mynta la 4 sngi eiei haduh ba ki paidbah ki la sngew jingjar bad bitar kaba la pynduh nong ïa ki nongkamai kali, ki khynnah pule, ki ba leit trei leit ktah bad ki ba bun kiba beh kam beh jam.
Kum ba la ïoh jingtip ka daw kaba la wanrah ïa kane ka jing dheng kali ha kane ka surok bah ka dei namar ka jingsdang jong ka NHAI ban pynkhuid bad maramot ïa ka ka surok kaba don ha ka thaiñ Khanapara, ha kaba ki la sdang ban khlong ïa ki nala um ki ba heh bad ïa ka surok bah, hynrei kane ka la wanlam pat ïa ka jing eh ïa ki paidbah ki ba hap ban ïaid lyngba kane ka surok, ym tang ïa ki paidbah hynrei khamtam ki kali kit nongpang ki hap ban mad lang ka juh ka jing eh, haduh mynta la kumba saw sngi eiei, bad ym pat tip haduh lano ki paidbah ki dang hap ban mad ïa katei ka jingeh.
Ki nongñiah kali kamai kiba ju kamai ha katei ka thaiñ, ki la pynpaw shisha ka jingeh ba ki hap ban mad namar kim ïohlad shuh ban kamai bad hap ban ieng shi jaka baroh shisngi namar ka jingdheng kali kaba jur, kaba la pynhiar ïa ka kamai kajih jong ki ha kine ki khyndiat sngi bala leit noh.
