Mawkyrwat, Ïaïong 09: Kum ka dak jong ka jingaimynsiem bad pynshlur ïa u samla Kevin Lyngdoh Sangriang uba la wanrah nam bad burom lyngba ka jingjop ha ka jingïakop ñiah saikil (cycle) ba la tip da ka 21st National Mountain Bike Championship 2025 ha Morni Hills, Haryana, ka Federation of Khasi Jaiñtia & Garo People (FKJGP) jong ka Mawkyrwat Circle bad ka Mawkyrwat District Cycling Association (MDCA) ki la ïoh ban pynkup burom ryngkat ka jingaisngewbha da ka momento ryngkat ka song pisa.
Lah ban kdew ba ka jingpynkup burom jong ki ka dei hadien ba u samla Kevin Lyngdoh Sangriang ula ïoh ban khur ïa ar tylli ki takma ksiar ha ka Cross Country Time Trial bad ka Cross Country Olympic (XCO) bad da kane ka la wanrah ïa ka jingithuh na ka ri ïa ka sap ñiah saikil ba kyrpang bad kaba dang kiew ha Jylla Meghalaya.
U bah Enbor Syiem, General Secretary jong ka FKJGP Mawkyrwat Circle, haba kren ha ka jingïalang u la pynpaw ka jingaikhublei na ka bynta u samla Kevin Lyngdoh Sangriang uba la poi sha ka thong jong ka jingjop ha ka 21st National Mountain Bike Championship 2025.
“Ka jingjop ban wanrah ka nam ka burom na kane ka jingïakop ka la long ka nuksa kaba bha na kawei bynta ki para samla jong ka dong ka thaiñ ba haba ki don hapdeng jong ka jingïaleh ha kano kano ka bynta ki dei ban don ïa ka thong ban poi sha ka jingjop khamtam eh ha ki jingïalehkai sports”, la ong u bah Enbor Syiem bad bynrap da kaba ai mynsiem ïa u Kevin ba nangne shakhmat un dang ïai don ïa ka mynsiem jong ka jingtrei shitom ban ïakhun sa ha kiwei pat ki jingïakop ha ki sngi ki ban sa wan.
Katba ha ka prokram pynkup burom ba la pynlong da ka Mawkyrwat District Cycling Association (MDCA), u bah B. Mawlong, IAS, Deputy Commissioner ka South West Khasi Hills District u la ong ba ka jingjop jong u Kevin Lyngdoh Sangriang ka la long ka kabu kaba biang eh ban ai mynsiem na ka bynta kiwei de ki samla hapoh jong ka distrik ba kin don ïa ka mynsiem jong ka jingshlur ban ïashimbynta ha ki jait jingïalehkai bapher bapher.
U la ai mynsiem ruh ïa u ba haba u la poi ha kane ka kyrdan jong ka nam jop um dei da lei lei ban don ka mynsiem jong ka jingsngew sarong hynrei u dei ban don ka mynsiem jong ka jingsngewrit khnang ba un nang kiew na kawei ka kyrdan sha kawei pat.
Shuh shuh u la ong ba na ka liang ka sorkar lyngba ka Planning Department ka don ha ka ban ïarap ne kyrshan na ka bynta ki samla kiba don sap bad na ka bynta u samla Kevin Lyngdoh Sangriang u la ïoh ban synñiang pisa kumba T. 40/- hajar tyngka khnang ba un nang lah ban un nang lah ban pynurlong ïa ki jingthmu kiba dang don ha khmat jong u ha kane ka kam.
Ha kajuh ka por u la ai mynsiem ruh ba ym tang ba un pynleit jingmut noh tang ha kane ka kam ïalehkai hynrei kum u khynnah u dei ruh ban minot ha ki jingpule khnang ba ka kam ïalehkai kan ïaid ryngkat bad ki jingpule ha ki kyrdan bapher bapher namar ka jingnang jingstad ka long kaba donkam.
U Kevin Lyngdoh Sangriang, uba dang 15 snem rta na ka shnong Domruah kaba hap ha ka South West Khasi Hills District, ha ka jingkren jong u, u la ong ha kane ka jingïakop ula ïoh ban khur ar tylli ki takma ksiar bad da kane ka jingjop ka la long da shisha ka burom ym tang ïa u shimet hynrei wat ïa ka ïing ka sem, ka dong ka thaiñ, ka distrik bad ka jylla hi baroh kawei.
“Ka jingkhur jong Nga ïa ki ar tylli ki takma ksiar ka dei ha ka Cross Country Time Trial bad Cross Country Olympic (XCO), kaba la wanrah ïa ka jingithuh na ka ri ïa ka sap ñiah saikil kaba dang kiew ha Meghalaya”, la ong u Kevin.
Ym tang kata, ha ka jingkren u la phla ruh ba ïa kane ka jingïalehkai ñiah saikil ki dang don kiba dang kren beiñ ne ym pat sngewthuh ïa ka jingkordor, hynrei watla katta ruh u khlem la kynran dien hynrei u la tur shaphrang ha kane ka kam naduh kaba sdang tad haduh ba un da ïoh kheit ïa u soh jong ka jingjop ha kane ka 21st National Mountain Bike Championship 2025.
Ha kane ka sngi, la donlang naduh u bah Enbor Syiem, General Secretary jong ka FKJGP Mawkyrwat Circle, u bah Kebarsing Lyngkhoi, Sports Secretary jong ka FKJGP Mawkyrwat Circle bad kiwei de ki para dkhot jong ka Seng lem ruh bad ki kmie ki kpa jong u samla Kevin Lyngdoh Sangriang kiba la long ki nongkyrshan bad ai mynsiem ha ki por baroh.
Kiba la donlang ha kane ka sngi ki long naduh u bah B. Mawlong, IAS, Deputy Commissioner ka South West Khasi Hills District, u bah H.S. Diengdoh, President jong ka South West Khasi Hills District Sports Association, u bah Ambrose Thongni, President jong ka Mawkyrwat District Cycling Association (MDCA), kiba ha ïing ha sem jong u samla Kevin Lyngdoh Sangriang lem bad kiwei de.
