Nongpoh, Ïaïong, 8: Ka la long shisha ka jingsngewkmen bad ka jingsngewsarong ïa ka Skul Ms. A.W. Thomas Secondary School, kaba don ha Umlangpur Killing ha Ri Bhoi District, ha kaba mynta u snem hadien 10 snem ba ki la phah ïa ki samla pule ban ïa khun ïa ka SSLC examination bad mynta u snem 2025 baroh ki khynnah kiba phah ban ïa khun ïa kane ka examination ki la pass bha bad la don ruh kiba la jan ïoh rung ha ka thup jong ka top-20 ka SSLC examination ba la pynlong da ka MBOSE.
Ha kane ka SSLC examination 2025 ki don 16 ngut ki samla pule kiba ïa khun ha ka SSLC examination 2025 na kane ka skul bad kaei kaba la pynkmen ïa ki bor pynïaid skul ka long 15 ngut ki pass bha ki don kiba pass ha ka kyrdan 1st bad 2nd division bad tang uwei uba la shu ïoh ïa ka simple Pass.
Na ka daw ka jingpas bha ki khynnah, ki bor pynïaid skul lyngba ka Managing Committee mynta ka sngi ki la pynkup burom ïa kine ki samla pule kum ka jingsngewsarong ba ki la wan rah nam wan rah burom ïa ka skul bad ka jingpynkup burom ka dei ruh shi bynta ïa ki khynnah kiba wan shakhmat ba la don kiba la ïoh letter haduh 5 tylli ki subject.
Ka Headmistress, Ka Miss Onita Sad, nalor ka jingpynkup burom ïa kiwei ki samla pule da ki dkhot ka Managing Committee bad ki nonghikai, ka la pynkup burom ruh ïa ka Samla Felisha Bandara kaba la ïoh ha ka kyrdan kaba nyngkong bad ryngkat 5 tylli ki subject ba ka la ïoh ïa ka letter marks.
Haba kren ha kane ka sngi, u Tbn. S. Sylhe, u President ka School Managing Committee bad uba dei ruh u nonghikai kane ka skul, u la ong ba kum ka skul ka pynpaw ïa ka mynsiem jong ka jingsarong halor ka jinglehbha ki samla pule ha kane ka SSLC examination 2025 bad kine kiei kiei baroh ki wan jia ka dei na ka jingtrei shitom bad ka jingminot ki samla pule kaba la pynlong ruh ïa ki bor pynïaid ka skul ban pynkup burom ïa kine ha kane ka sngi kum ka jinglehkmen halor ka jingjop jong ki ha kane ka SSLC examination.
Shuh shuh, nalor ka jingkitbok kitrwiang ïa kine ki samla pule ba kin dang kiew shaphrang ha ki jingpule, ka skul ka khmih lynti ruh ba kane ka jingjop jongki kan ai mynsiem ïa kiba bun ki khynnah jong kane ka skul bad ruh kum ki bor pynïaid skul ki khmih lynti ruh ba ha ki snem ban sa wan kin don ki khynnah kiba lah ban rung sha ka thup jong ka top 20 ha ka SSLC examination ba la ju pynlong da ka Meghalaya Board of School Education, u la bynrap.
