Shillong, Lber, 26: Ka Sorkar Jylla ka la rai ban thied ïa ka building kaba kot T. 20 klur na ka bynta ban buh ïa ka Meghalaya Guest Gouse ha Bangalore ban pynsah ïa ki nongleit jingleit bad ïa ki samla pule kiba dei na kane ka jylla Meghalaya.
Haba pyntip ïa kane ha ka sngi Balang hadien ba la wai ka jingïalang Kynhun Myntri, u nongaiktien ka Sorkar Jylla Bah Paul Lyngdoh u la ong ba ka building ba la thmu ban thied ka dei kaba don ha nongbah Bangalore kaba lah ban ngiam 50 ngut na ka bynta ki jaka thiah jong ki shynrang bad 50 ngut na ka bynta ki kynthei.
U Bah Paul u la ong ba kane ka jingshim rai jong ka Sorkar Jylla ka long namarba ka nongbah Bangalore ka dei kaba ki paidbah na ka jylla Meghalaya ki bun bha kynthup ïa kiba trei bad ïa ki samla kiba pule ha Bangalore.
Haba kylli, hato ka sorkar ka don jingthmu neem ban tei ïa ka Meghalaya House ha Bangalore, u Bah Paul u la ong, “kumba ka long mynta, ka jingdonkam kaba kyrkieh ka long ban pynbiang ïa ka jingdonkam jong ki samla pule. Ka Meghalaya House ruh ka dang don ha ka jingthmu hynrei khnang ban pynurlong ïa ka jingdonkam kaba kyrkieh ha kaba katto katne ngut ki samla pule ki shem jingeh bha ban ïoh jaka sah bad ki dor ki long kiba heh bha hynrei ban tei ïa ka Meghalaya House kan donkam kham bun kum ka jingpynkha ïa ki kam ki jam bad ka jingbuh ïa ki ophisar.” “Kumta khnang ban weng ïa ka jingdonkam kaba kyrkieh ngin sa thaw nyngkong ïa kane ka Guest House ba la pynkhreh kyrpang na ka bynta ki nongleit jingleit bad ki samla pule ka jylla,” u la bynrap.
