Shillong, Lber, 26: Ban weng ïa ka jingkhapngiah jong ka Sor Shillong, ka Sorkar Jylla ka la rai ban tei ïa ka Police Reserve ba thymmai ha ka shnong Tynring kaba hap hapoh ka New Shillong Township. Ïa kane la pyntip da u nongaiktien ka Sorkar Jylla Bah Paul Lyngdoh uba long ruh u Myntri ka Sorkar Jylla haba kren sha ki lad pathai khubor hadien ba la wai ka jingïalang jong ka Kynhun Myntri kaba la long ha ka sngi Balang.
U Bah Paul u la ïathuh ba ka Sorkar kan sa ai ïa ka jaka kaba heh 50 akar na bynta ban shna ïa ka police reserve ba thymmai ha ka shnong Tynring bad kane ka jaka kan long ruh kum ka khyrdop hapdeng ka Administrative City bad ka Knowledge City jong ka New Shillong Township. “Ka Kynhun Myntri ka la ai jingmynjur ïa kane ka jingtyrwa bad ngin sa ïaid noh shakhmat ban tei ïa ka Police Reserve ka ban ïarap ban pynkylluid ïa ka sor Shillong,” u la bynrap.
