Shillong, Lber 25 : Palat ar spah ngut tam ki nongïalehkai na kylleng ka jylla Meghalaya ki la ïashim bynta ha ka (L) Dr. F. T. Sun 2nd Memorial Open Arm Wrestling Championship, 2025 kaba la long ha ka sngi Saitjaiñ jong ka taiew baladep ïa kaba la pynlong da ka Sunsen Power Gym.
Ka jingpynlong ïa kane ka jingïakob ka long ban pynsah nam ïa u (L) Dr. F. T. Sun uba la long u nongseng ka Sunsen Power Gym bad u President barim jong ka Meghalaya Arm Wrestling Association (MAWA).
Ka jingïalehkai mynta u snem ka long kaba kyrpang bha, ha kaba la sakhi ïa ka jingïashim bynta jong ki para-athletes lane kiba don jingduna ha ki dkhotmet.
Ïa kane ka jingïalehkai la plie da u Sports and Cultural Secretary ka Khasi Students’ Union (KSU) Central Executive Council u Bah Eric Anthony Nongkynrih ryngkat ka jingsakhi lang jong ki katto katne ngut kiwei pat ki riewpawkhmat.
Ïa ka jingïakob la phiah ha ki kyrdan bapher bapher hapdeng ki shynrang bad ki kynthei.
Ïa ka nam Champion of the Champion ha ka liang jong ki shynrang la ïohrah da u Mebansan Sangma (Mawkyrwat), u Jimmison Marwein (Mawkyrwat) bad ha ka liang jong ki kynthei la ïohrah da ka Victoria Nongshli (Ri-Bhoi) bad ka Wandalin Syiemïong (Power Gym) na Shillong.
