Pynkhreh ka West Khasi Hills lada khynñiuh u jumai

Nongstoiñ, Lber, 18: U Deputy Commissioner cum Chairman (DDMA) West Khasi Hills District u la pyntip ba ka State Disaster Management Authority Meghalaya Shillong, kan pynlong ïa ka State Level Mock Exercise on Earthquake Disaster ne ka jingpynkhreh lada wan jia ka jingkhynñiuh jumai hapoh ka Jylla na ka bynta u snem 2024-25.
Kane ka prokram ka long ha ryngkat ka jingïatreilang ka National Disaster Management Authority (NDMA), Ministry of Home Affairs jong ka Sorkar India bad ki bor pynïaid District ka West Khasi Hills, kaba la sdang naduh ka 15 tarik u Rymphang, 2025 ha Conference Hall DC office da ka Orientation & Coordination meeting da ka NDMA Nongstoiñ.
Nangta da ka State Table Top Exercise (TTE) lyngba ka online mode ha baroh kawei ka Jylla mynta ka sngi ka 18 tarik u Rymphang 2025 bad ban pynkut pat da ka Mock exercise ka ban pynlong ha ka 20 tarik u Rymphang 2025 ha Siejlieh St Francis Di Asisi Higher Secondary School, Seijlieh, Nongstoiñ.
Ha kane ka Mock Exercise la shu mutdur ba u jumai ba jur u ba 8.3 ritcher scale u la khie, yn ïashimbynta da baroh ki District officer, ki pulit, Fire & Emergency Services, Aapda Mitra Volunteers bad kiwei kiwei de. Kan don ruh ka jingpynpah ïa ka Siren na DC office shwa ban sdang ïa kane ka Drill. Kumta la kyrpad ïa ki paidbah ba kin ym sheptieng ne syier namar ka dei ka jingpynkhreh kumno ban ai jinghikai bad ban ïatreilang bad ki bor pynïaid District.
Mairang: Ka Meghalaya State Disaster Management Authority ha ryngkat ka jingïatrei lang bad ka bor synshar district jong ka EWKHD, kan pynlong ïa ka State Level Mock Exercise ha ka 20 tarik u Lber 2025 naduh ka por 9:30 baje mynstep. Kane ka Mock Exercise kan long lang ha baroh ki District jong ka Meghalaya. Ka jingpynlong ïa kane Ka Mock Exercise ka dei kum shi bynta ban pynkhreh lada wan u jumai uba jur ka jing khynniuh haduh ka 8.3 ha ka Richter Scale.
Kum ka dak ban snoh kti lang na ka liang ka Ophis DC EWKHD kin ïashimbynta lyngba ki Ophisar ka District, naduh ki Pulit, ki tnad Fire & Emergency Services, Hospital, ki skul, ki College, ki NGO, ki dkhot jong ka ïing dorbar shnong, ki Volunteer na ki kynhun bapher bapher kum ka Bharat Scouts & Guides, Indian Red Cross Society, NSS, Aapda Mitra Volunteers, bad kiwei kiwei ki tnat treikam. Ïa kane ka drill yn sdang da ka jingpynpah ïa ka (siren) na ka ophis jong ka Deputy Commissioner, Mairang ban pynbna ba ka la don ka khynñiuh jumai.
Shuh shuh, la ong ba ki jaka ba la ithuh kum ki jaka ba shah ktah ki long ka shnong Mission Mairang ka Bidon Shopping Complex, ki ïing treikam bad Ophis ka Deputy Commissioner, ka Petrol Pump M/S Langstieh Mairang Petrol Pump Service Station Lumsohkhlur, nangta ka skul ka Mairang Presbyterian Higher Secondary School bad ka Tirot Singh Memorial Civil Hospital.
Ha Mairang, yn buh ïa ki jaka Sumar kum ka Medical Camp, Staging Area, Relief Camp, Incident Command Post, Base Camp, bad kiwei pat ha Mairang Mission Football Ground, Petrol Pump, Lumsohkhlur Village bad ka jaka shah lynshop khyndew ha Mawlangren Umjei hapoh Mawthadraishan Block.
Kum shimbynta kane ka drill la buh ruh ïa ki kynhun ïarap, ki Ambulance bad kiwei ki nongïarap kin ïashimbynta. La bthah ïa ki paidbah ba kim dei ban tieng na ka jingmynsaw, ban ïatreilang bad ka jingpynbeit jong ka District Administration bad ban pynbeit bha ïa ka leit ka wan jong ki ban lait na ka jingeh ha ka ïaid ka ïeng jong ki kali.