Ïaroh u Bah Hek ba thaw ïa ka BJP ïa ka Fact Finding Committee halor ka kam tih dewïong beaiñ

Shillong, Lber 18: U nongïalam ka BJP bad u Myntri ka sorkar jylla u Bah AL Hek ha ka sngi baar u la ïaroh ïa ka rai jong ka party ba ka la thung ïa ka fact finding committee halor ka jingshah kynnoh ba ka don ka jingtih dewïong beaiñ ha ka jylla.
Haba kren sha ki lad pathai khubor u Bah Hek u la ong, “Nga khlem ïa kynduh ïa ki nongïalam ka BJP ha ka jylla mynta lah jan saw ne san bnai hynrei nga ïohi ha ka kot khubor shaphang ka jingshim ka rai ban thaw ïa ka fact finding committee. Ki la leh ïa kane na ka bynta ka bha ka miat jong ki paidbah kumta ngi donkam ban ai ka jingïaroh ba ka la shim ïa kane ka kam.”
“Haba ngi la rah ïa kane ka mat na ka bynta ka jingmyntoi jong ka jylla bad ki paidbah, ka jingmih ka dei ban paw bad ka hok jong ki paidbah ka jylla Meghalaya,” u la ong da kaba bynrap, “Kam dei na ka bynta ka BJP ban shim ïa ka rai, hynrei ka dei ïa ka sorkar jylla ban shim ïa kane ka rai. Ngi kum ka sorkar ngin shim ka rai katkum ki jingujor ym tang ki kam seng saiñ pyrthei bad wat ki paidbah ruh. Ka sorkar kan shim ïa ka kam halor ki jingujor jong ki paidbah.”
Ka BJP, kaba dei ka paralok ba ïatreilang hapoh ka sorkar MDA ba la ïalam da ka NPP ka la aipor 40 sngi ïa ka fact finding committee ban aiti ïa ka kaiphod halor kane ka jingkynnoh tih dewïong beaiñ.
U MDC ka Tura MDC u Bernard R Marak u la khlieh ïa kane ka committee kum u convener, u Bah Mariahom Kharkrang kum u secretary bad 8 ngut ki dkhot kiba kynthup ïa u Bah Lakhon Biam, Raphius Sangma, Commanderful Sana, Karabar Tynkan, Daniella Nonglait, Darihun Marbaniang, Arun Kumar bad Pramod Jain.