Da ka Mock Exercise la pynlong ka jylla ban pynkhreh ba ka jingshah pynjulor ha u jumai

Shillong, Lber 18: Ka Meghalaya State Disaster Management Authority (MSDMA), ha ka jingïatreilang bad ka National Disaster Management Authority (NDMA), ki la pynlong ïa ka State-Level Mock Exercise halor ka jingshah pynjulor jong u jumai hapoh ka State Convention Centre ha Shillong ha ka sngi baar.
Ka kong M. War Nongbri, Commissioner & Secretary, Revenue & Disaster Management Department bad Executive Director ka MSDMA, ka la plie ïa kane ka jingïalang da kaba ai ka jingkren maitphang kaba la banjur halor ka jingdonkam ban pynlong kiba la pynkhreh haba wan kino kino ki jingshah pynjulor ha ka jylla.
Ha ka jingkren jong u Sanjay Goyal, Commissioner & Secretary, Revenue & Disaster Management Department, u la pynpaw ka jingkyrmen ba kane ka jingpynkhreh kan ai ki lad kiba kordor bad ki jingtip ki ban ïarap ïa ka jylla ban pynkhlaiñ ki lad jingïada halor ki jingwan ki jingshah pynjulor.
U la banjur ba kane ka dei ka por kaba bha ban khmih biang ïa ki lad ki lynti bad ki jingtei khnang ban lah ban pynthikna ba dei ban lah ban pyndonkam pura bad ban pynkhlaiñ ka jingshim kam kaba sted bad ka jingïatreilang ban jubab haba wan ki jingjia shah pynjulor ha ka jylla.
Ha kawei pat ka liang, haba kren ha kane ka sngi u Lt. Gen. Syed Ata Hasnain (Retd.), dkhot ka NDMA, New Delhi, u la kren halor ka jinglong kongsan ban don kine ki jingpynkhreh ne ki exercise halor ki kam ba shah pynjulor ha ki bor ka mariang. U la kyntu ïa ki ophisar ba kin bishar bha ïa ki 10-point agenda kiba don hapoh ka NDMA website bad banjur halor ka jingdonkam ka jingïatreilang ki paidbah, ka jingdonkam ka SACHET early warning app, ki school bad hospital safety program, ka jingdonkam ïa ka jingïatreilang bad ki kynhun ha ka por ba wan ka jingshah lynshop ha ka mariang. U la banjur halor ka jinglong kongsan ban sngewthuh ïa ki rukom pynïaid ha ka por ba wan ka jingshah pynjulor.
Ha kane ka sngi ka la don ruh ka jingpyni ïa ki online presentation na ki 11 tylli ki district, kaba pyni ïa ki jinglong ba la khreh jong ki. Ha kane ka exercise la shim bynta da ki ophisar na ki tnat bapher bapher.
Ha kane ka prokram la pynbud ruh da ka Table Top Exercise, ba la pynïaid da u Lt. Gen. Syed Ata Hasnain (Retd.), Member ka NDMA, New Delhi, bad u Sanjay Goyal, Commissioner & Secretary, Revenue & Disaster Management Department. La pynïaid lang ruh ïa kane ka jingïakren da u Maj. Gen. Sudhir Bahl (Retd.), Lead Consultant (ME & IRS) ka NDMA, New Delhi.
Ha kane ka sngi ka la long ka lad kaba khraw ïa ki heh ophisar ban khmih bad ïasyllok halor ki kam ban pynkhreh bad kumno ban pynïaid ïa ka sawdong sawkun.