Ki kam ki la ïaid na ka bynta ka jingpynbiang ïa ki tiar ki tar ha Rajabala Fire Sub station, ïathuh u Bah Prestone

Shillong, Lber 13: U Symbud Myntri Rangbah ka jylla bad uba khmih ruh ïa ka tnat Home (Police) u Bah Prestone Tynsong u la pyntip ba ka jingtei bad ki tiar ki tar na ka bynta ka Rajabala Fire Sub-station ka dang ïaid shakhmat.
Ha ka jingjubab ha ka sngi Palei hapoh Ïingdorbar Thaw aiñ u Bah Tynsong u la ong ba ïa ka jaka la dep ban shim da Superintendent of Police (F&ES), Tura.
Ka jingthungkam ïa ki nongtrei pynlip ding ne ki firefighter bad kiwei pat ki nongtrei ka la nang ïaid shakhmat da kaba pyntip ba kane ka sub-station ka donkam kumba 15 ngut ki briew ban trei.
U la pyntip ruh ba ka sorkar ka don ha ka lynti ban pynlong ïa kane ka fire sub-station kaba treikam pura.