Shillong, Lber 13: Ka Sorkar Jylla kam pat don jingthmu ban buh ïa ka jaka theh ñiut katkum ka juk saïan ha shnong Mawkhanu, kaba hab hapoh ka New Shillong Township.
“Ka Sorkar kam pat don jingmut ban buh ïa ka jaka theh ñiut ka juk saïan ha katei ka jaka,” pyntip u Symbud Myntri Rangbah ki kam Pynroi Sor ka jylla u Bah Sniawbhalang Dhar haba jubab hapoh ka ïingdorbar ha ka sngi Palei.
Halor kane u MLA ka VPP na Mawlai u la ai jingmut ïa ka jingdonkam ba ka Sorkar kan shna ïa ka Waste Management Plan ïa ka Mawkhanu. Katkum ka jingong jong u, ka Sorkar ka la dep ban thied ïa ka jaka haduh 800 acre ha Mawkhanu.
Halor kane, u Bah Sniawbhalang ula ong ba ka daw ba ka Sorkar kan buh ïa ka jaka theh ñiut ha Mawkhanu ka dei namar ka la tyrwa ïa ka jaka thymmai ha Nonghali haba bynrap ba ka jaka ba donkam ban buh ïa ka jaka theh ñiut ka long hapdeng 100-150 acre.
Halor kane u Symbud Myntri Rangbah ula pyntip ba kam pat don satia ka jingthmu ban pynkylla ïa ka jaka sha ka European Ward haba bynrap ba ka Sorkar ka dang pynkhreh mynta ïa ka master plan.
U la jubab ruh ba ym don satia ki nongbuhai shnong beaiñ ha ka thaiñ Mawkhanu haba kular ïa u MLA ka VPP na Nongkrem ba u long uba la khreh ban pynlong ïa ka jinghiar jurip ïa ka thaiñ lada donkam.
