Shillong, Lber 13: Ka Myntri ka tnat ka Koit ka Khiah ka kong Ampareen Lyngdoh ha ka sngi Palei ka la pyntip ba ka jingkyntiew kyrdan ïa ka Manggakgre Sub-Centre (MSC) sha ka Public Health Centre (PHC) ka la nang ïaid bad ka kam ha kaba ïadei bad kane ka bynta ka la nang ïaid shaphrang.
Haba jubab hapoh Ïingdorbar Thaw aiñ ha ka sngi Palei ka Kong Lyngdoh ka la ong ba ki lad ki lynti bad kiwei ki jingpynkhreh ki ban don ha kane ka PHC hadien ba la pyndep ïa ki jnit ki jnat kin long ka out patient department (OPD), ki jingthiah kumba 10 tylli na ka bynta ka in-patient department (IPD), ka labour room, ka laboratory, ka emergency service, ka pharmacy bad ki residential quarter na ka bynta ki doktor bad ki para medical staff, nalor kiwei kiwei pat.
Ka la pyntip ruh ba ïa ka jingbuh maw nongrim la dep ban buh na ka bynta ka sub centre ha ka snem 2022.
“Ngi la lah ban pynlait ïa ka tender ha ka 18 tarik u Kyllalyngkot, 2023 bad ka kam ka la sdang ha u Kyllalyngkot u snem 2025 bad ka jingïaid jong ka kam ka la long 85%,” pyntip ka kong Lyngdoh.
“Ki kam ki la ïaid bad shisien ba la pyndep ïa ka building ïa ka HR yn sa phah na ka bynta ban pyntreikam ïa kane ka PHC,” ka la pynthikna.
Na ka liang ka Myntri ka la pyntip ruh ba kan shim khia ïa ka jingtyrwa jong u MLA ka TMC u Rupa Marak na ka bynta ban pynsted ban kyntiew kyrdan ïa kane ka jaka sumar.
