Kumba 97.5% ka jaka la dep ban aiti sha ka NHIDCL ban shna ïa ka surok Shillong Western Bypass

Shillong, Lber 13: U Symbud Myntri Rangbah u ba khmih ïa ka Tnad PWD (Roads) Bah Prestone Tynsong ula pyntip ba haduh 97.5% ka jaka la dep ban aiti sha ka National Highway & Infrastructure Development Corporation Limited (NHIDCL) ban shna ïa ka surok Shillong Western Bypass.
“Ïa kaba sah ba 2.5% ka jaka, ki Deputy Commissioner ka East Khasi Hills bad Ri-Bhoi ki dang leh ïa ka kam ba donkam ban pynthikna ba ngin lah ban pynbeit ïa kat ki jingeh kiba mih na ki trai jaka,” ong u Bah Prestone haba jubab hapoh ka ïïngdorbar ha ka kynta kylli jingkylli.
U ïathuh ba T.455,39,34,752 la pynlut ha kaba thied jaka na ka bynta ka projecr katkum ka RFCTLAAR Act, 2013 ha East Khasi Hills District bad T.121,40,63,701 ha Ri-Bhoi.
U Bah Prestone u pyntip ruh ba ka jingpyntrei ïa ki lai tylli ki song (package) jong ka project ka la sdang mynta bad u la ong, “Ka jingïaid jong ka kam ka long kaba ihun.”
U Symbud Myntri Rangbah ula pynpaw ruh ba ka project kam shym la mad ïa kano kano ka jingeh ha kaba ïadei bad ki jaka puta lait noh tang ki jingkam bad jingïakam markylliang ïa ka jinglong trai da kaba kular, “Kum kine kiei kiei yn sa pynbeit noh da ki DC jong baroh artylli ki District”.
Ha kaba ïadei bad ka jingkylli ba wanrah da u Nongïalam ka Liang Pyrshah la ki don ki longïing ba khlem jaka ba shah ktah ha ka project, u Bah Prestone ula ong, “Ha ka jingshisha ka mat kaba mih haduh kane ka khyllipmat ka dei kaba la shimkhia ban pynbeit da ki arngut ki DC. Ngi don hangne kum ka Sorkar ban ïarap ïa ki longïing kiba shah pynkynriah. Lada ka lynti ïaid ka surok ka ïaid na kine ki jaka, ka Sorkar kan sa shimkhia ban leh eiei na ka bynta kine ki longing.”
Shuh shuh u Bah Prestone u la pynshai ruh ba kam don satia kano kano ka jingpyndonkam bakla ïa ka pisa jong ka project haduh mynta.
U Bah Prestone ula ong ba kam pat don satia kano kano ka jingujor ne jingkynnoh da ki trai jaka ba ka don ka jingkhate haduh 10 lane 20% ka bai jaka. “Ym pat don kano kano ka jingujor ba ïohpdiang da ki DC,” ula ong.