Ki jingbthah na ka Balang Presbyterian Sakwang halor ka Jingïaseng kaba 23 jong ka KJP Synod Sepngi

Mawkyrwat, Lber, 05 : Kum ka Balang Presbyterian Sakwang kaba hap ha ka Sakwang District bad Mawkyrwat Presbytery ka dap da ka jingsngewkmen bad jingainguh ïa U Blei Uba long U tynrai jong ki kyrkhu baroh ha kaba mynta u snem 2025 kan pdiang ïa ka Jingïaseng jong ka Khasi Jaiñtia Presbyterian (KJP) Synod Sepngi kaba 23 ka ban sdang naduh ka 6 haduh 9 tarik mynta u Lber, 2025 ha ka Balang Presbyterian Sakwang.
Namarkata, na ka liang ka Balang Presbyterian Sakwang ka sngewbha ban buh ïa ki katto katne ki jingbthah bad pyntip kiba donkam na ka bynta ka Jingïaseng jong ka KJP Synod Sepngi ha ki tarik 6 haduh 9 tarik u Lber, 2025 da kaba ong, “Namar ba ka jinglong ka suiñbneng ka dang khriat bha, kumta la bthah ïa kiba wan sha ka jingïaseng ba ki dei ban wanrah ne pynkhreh ruh ki jaiñ-phong bad ki jaiñ-kup thiah kiba syaid”.
Shuh shuh ha kaba ïa dei bad ka jingïaid jingïeng jong ki kali pat la pyntip ba ki jaka ïeng kali ha ka Sngi U Blei kim da jngai than na ka jaka pynlong Jingïaseng da kaba bthah ba ki kali ki lah ban ïaid lyngba ki 3 tylli ki lad surok ban poi sha ka shnong Sakwang kita ki long kumne: Ki kali kiba wan na Shillong – Mawngap – Weiloi lane na Mawsynram kin poi lang ha Weiloi da kaba kin ïaid lyngba ïa ka surok ka ban poi sha Jakrem bad na Jakrem sha Sakwang ka jngai tang kumba 1 km ei ei.
Nangta shuh shuh, ki kali kiba wan na ka surok Mairang – Pariong – Jashiar lane na Nongstoiñ – Mawthawpdah bad kin poi sha Jashiar, bad kin ïaid beit lyngba ka surok Nongbah-Marshillong sha ki jaka ïeng ba la pynkhreh kiba ha shnong Pyndensakwang.
Katba ki kali kiba wan na Ranikor – Mawkyrwat bad kiba wan na ka surok Rangblang – Mawranglang – Mawkyrwat kin ïaid poi lang da kaba ïaid lyngba ka surok Pyndensakwang bad ïaid beit sha ki jaka ïeng ba la pynkhreh.
Ym tang kata, kino kino ki kali kiba wan poi kham kloi hapoh ka 8 baje mynstep kin ïoh ban rung sha ki jaka ïeng kali kiba khamjan na ka jaka ba pynlong jingïaseng hynrei kiba wan pat ïa ka 8 baje ki la hap ban kohnguh ïa ki jingbthah jong ki nongpynïaid kiba la don lypa ha ki lad ki lad da kaba kin rung ha ki jaka ïeng kali kiba jngai tam ki long tang kumba 1 kilometre ei ei na ka jaka pynlong jingïaseng lait noh kiba don ïa ki car pass bad kane ka dei kyrpang ha ka Sngi U Blei kaba dei ha ka 9 tarik u Lber, 2025.
Kum ka Balang Presbyterian Sakwang halor kitei ki jingbthah baroh ka don ka jingkyrpad rit ïa ki paidbah nongwan jingïaseng na kylleng ki Balang ba kin ai lem ka jingïatreilang da kaba kin kohnguh ïa ki jingbthah khnang ba ïaid ka ïeng jong ki kali bad ki nongwan jingïaseng kan long kaba ïaid beit ïaid ryntih ha ki liang baroh.