Shillong, Lber 05 : U MLA ka Mawlai, Bah Brightstarwell Marbaniang u la kyrpad ïa ka sorkar jylla ba kan pynstet ban shna noh ïa ka Dispensary ha Mawlai Nonglum naba haduh mynta katei ka jaka ai jingsumar ka trei kam na ka iingwai.
Na ka liang ka Myntri ka Koit ka Khiah, Dr. Ampareen Lyngdoh haba jubab ha ki kynta kylli jingkylli ha Iing Dorbar Thawain ka jylla ha kane ka sngi Balang ka la pyntip ba ïa ka jingtyrwa ban shna noh ïa ka State Dispensary ha Mawlai Nonglum, mynta ka dang don ha ka jingpeit bniah jong ka sorkar.
Ka Myntri ka la ong ruh ba bun ki rai la dep ban shim hadien ba ki la dep ban wan jurip ïa katei ka jaka.
“Namarba ka jaka kam dei jong ka Health Department, kumta ngi hap ban ïoh shwa ïa ka NOC na ka Dorbar ba dei peit,” ka la ong.
La pyntip ruh ba wat hadien ba ka jingmang ïa ki jinglut na bynta katei ka projek ki la dep ban pynbiang hynrei ki donkam pat ban peit bniah ïa ka SOR jong ka PWD bad ruh katkum ka jinglong jingman ka pla tyngka. “Ngin sa shimkhia ïa kane ka kam,” ka la kular.
