La mana ban pynlong jaka shet ne bam harud surok bad bret jakhlia ha ki jaka jngohkai

Mawkyrwat, Nailur 09 : Ka District Magistrate jong ka South West Khasi Hills District, Mawkyrwat, ka Aitinolin L. Mawlong, IAS, ka la pynmih ïa ka hukum hapoh ka Section 163 jong ka Bharatiya Nagarik Suraksha Sanhita (BNSS) ban khang pyrshah ïa ka jingkhreh bam ne pynlong jaka bam harud surok, ka jingbret jakhlia ne jingbret pathar ïa ki jaboh ha ki jaka jngohkai, ki rud surok, bad kiwei kiwei de ki jaka paidbah ha kylleng ka South West Khasi Hills District.
Ïa kane ka hukum la pynmih hadien ba ka la poi ka jingpyntip na ka Tourism Department, jong ka sorkar Meghalaya, halor ka jingnang bun jong ka jingpynkhreh bam harud surok, ka jingbret jakhlia, ka jingbret pathar ïa ki jaboh bad kiwei kiwei ki kam kiba wan rah ka jingjaboh ruh ïa ka mei mariang bad ka ktah ruh ïa ka jingkoit jingkhiah jong ki paidbah bad khamtam eh kam ktah ïa ka jingitynnad jong ki sawdong sawkun hapoh jong ka South West Khasi Hills District.
Namarkata, ka District Magistrate ka la pynpaw ba na ka jingbym shimkhia ne leh bymsuid ñiew jong ki katto katne ka lah ban wanrah ïa ka jingpynjulor ïa ka mariang, ka jingban khia ïa ki shnong ki thaw, ki jingeh ha ka khuid ka suba bad ha ka koit ka khiah, ka jingpynwit ïa ka leit ka wan ki kali, ka jingma na ki thylliej ding lada pyndonkam da ki dieng thang, bad ruh ka lah ban ktah ïa ka jingitynnad jong ka South West Khasi Hills District kum kawei na ki jaka jngohkai kaba don ka jingkitkhlieh.
Ha kane ka kyndon aiñ jong ka 163 BNSS, la khang pyrshah ban pynlong ka jingpynkhreh bam harud surok, kaba kynthup ïa ka jingpyndonkam da ki dieng, u rnga, ka LPG cylinder lane kano kano ka fuel kaba lah ban meh ding, ha ki bynta harud surok, ki viewpoint lane kiwei ki jaka paidbah. Nangta, ka jingbret lane kawang ïa ki jaboh, kaba kynthup ïa ki plastik, ki jingbam ba tam, ki bottle, ki tin, ki jingsong marbam lane kino kino kiba long ka jingpynjaboh, ha ki jaka paidbah lane ha ki jaka kiba ym shym la buh kyrpang na ka bynta ban theh ïa ki jaboh.
Bad ka jingbret pathar, theh lane thep ïa ki jaboh kiba shñiuh lane kiba long um, ha ki jaka paidbah, ki khlaw, ki tyllong um, ki nala, ki bynta harud surok lane ha kano kano ka jaka kaba ym shym la pynïada na ka bynta kane ka jingbret jaboh ha kaba ïa kine ki kam la khang pyrshah ban leh ha baroh ki jaka jngohkai, ki surok, bad ki jaka paidbah hapoh South West Khasi Hills District.
Kumta, na ka liang ka District Administration ka la kyntu ïa baroh ki paidbah, ki nongwan jngohkai bad kiwei de ba kin bud ryntih ïa kane ka hukum bad ban ai ka jingïatreilang ban pynneh ïa ka jingkhuid, ka jingïada ïa ka mariang, ka jingshngaiñ jong ki paidbah bad ki jaka jngohkai kin neh ha ka jingitynnad da kaba kin don ka jingkitkhlieh na ka bynta ka bha ka miat ha baroh kawei ka South West Khasi Hills District.
Ka la hukum ruh ba namar ka jingdonkam kyrkieh jong kane ka mat, ïa kane ka hukum la pynmih bad ba kan treikam mardor, bad kan dang neh haduh ban da pynmih da kawei pat ka hukum, katkum ki kyndon jong ka aiñ.