Shillong, Nailur 09 : Ka Myntri ka tnad Pla-tyngka jong ka Sorkar Pdeng, ka Nirmala Sitharaman ka la kular ba ka Sorkar India kan pynsted biang ïa ka jingtrei ban pynsted ïa ki Externally Aided Projects ha ka thain shatei lam-mihngi jong ka Ri, hadien ka jingïakynduh lang bad ki Myntri Rangbah jong Meghalaya bad Assam.
U Myntri Rangbah jong Meghalaya Conrad K Sangma bad u Myntri Rangbah jong Assam Himanta Biswa Sarma ki la ïakynduh ïa ka Myntri ka tnad Platyngka ha nongbah New Delhi ha ka sngi Balang ban ïakren halor ki mat kiba ïadei bad ki Externally Aided Projects (EAPs) jong ki jylla jong ki.
Da kaba thoh ha X, u Conrad Sangma u la ong, “Nga la ïakynduh ïa ka Myntri ka Platyngka ka sorkar pdeng ka @nsitharaman ryngkat bad u Myntri Rangbah jong Assam, Dr. @himantabiswa ban ïakren halor ki mat kiba ïadei bad ki Externally Aided Projects. Nga ai khublei ïa ka Finance Minister namar ba ka ju kyrshan barabor ïa ki jingangnud jong Meghalaya bad ka thaiñ NE.”
Na ka liang u Himanta pat u la ong, “Da ka jingthmu ban pynkiew ïa ka jingpyntrei ïa ki kam pynroi sha Northeast India, nga ryngkat bad u Myntri Rangbah jong Meghalaya u @SangmaConrad ngi la ïoh ban ïakynduh ïa ka Finance Minister,” thoh u Himanta ha X.
Shuh shuh u la ong ba ki la pynsngew da ka jingsngew skhem ban wanrah ïa ka jingpynsted thymmai ha ka jingtrei jong ki Externally Aided Projects ha baroh ar tylli ki jylla bad ban plie ïa ki lad ban bei tyngka thymmai. Shuh shuh u ong ba na ka liang ka Myntri ruh ka la pynpaw ïa ka dak ka jingmynjur ryngkat ka jingkular ba ka sorkar India kan pynstet biang ban pynïaid shakhmat ïa kane ka bynta jong ka roi ka pa.
Ki EAPs ki dei kiba pyntreikam da ka jingbei tyngka na ki kynhun barri kum ka World Bank, ADB bad JICA bad ki long kiba kongsan bha na ka bynta ban bei tyngka ïa ki projek kiba heh ha ka thain shatei lam-mihngi jong ka Ri.
