Shillong, Nailur 09: Ka North East Students’ Organisation (NESO) ha ka kyrwoh khubor ka la pynrem jur halor ka jingïap jong u nongtem na Manipur Chongtham Vikram Singh (55 snem ka rta) ha Southeast Delhi bad dawa ban buh da ka por ïa ka jingtohkit ka bym shah liang halor katei ka jingjia.
Ka kyrwoh khubor ka la ong ba u Singh, uba shong basah ha Kilokari, ula ïap hadien ka jingkynnoh ba ula shah thombor ha kawei ka kynhun ki briew habar ka ïingsah jong u namar ba u pyrshah ïa ka jingpynthud bad ka jingpynwit ka jong ki.
Shuh shuh ha ka shithi pynrem jur, ka NESO ka la ong ba ka sngew pangnud bad ïa ka hok ban ïoh ïa ka jingsuk ha la ka jong ka ïing ka la lam pynban sha ka jingduh ïa ka jingim jong u.
Halor kane na ka liang ka kynhun kaba kynthup ïa ki 8 tylli ki seng kiba hakhmat jong ki samla pule ka thaiñ shatei lammihngi, ka la dawa ba dei bam shimkhia mardor bad ban leh da kaba tyngeh pyrshah ïa kito kiba la donkti bad kala dawa ba dei ban pynshitom tyngeh ïa ki katkum ki kyndon aiñ.
Na ka liang ka NESO ka la ong, ba kane ka jingjia kadei ban peit ha kata ka rukom kaba ïar ha kaba ïadei bad ka jingshun bad jingisih jaidbynriew bad ki kam umsnam kiba la mad da ki paidbah ka thaiñ shatei lammih ngi hapoh ka ri India.
Ha ka kyrwoh khubor na ka liang ka NESO ka la pynpaw ba ki samla pule, kiba trei ba ktah bad kiba shong ba sah na kane ka thaiñ shabar jong ka jylla, kila mad ïa ki jingshah kynthoh, jingshah byrngem byrsit, jingshah ktah kti bad ka jingbym kynthup lang ïa ki ha ka imlang sahlang namar ka dur ka dar ka jong ki bad ïa ka jaka kaba ki wan.
“Ïa kitei yn ym lah ban kyntait ba kidei kiba la jia tang ha ki katto katne. Haba ki nongshong shnong ka thaiñ Shatei lammihngi kim sngewshngaiñ ne ym shim la pdiang sngewbha ïa ki ha la ka ri lajong, ka pynmih ïa ka jingsngewkhia kaba khraw halor ka jingshngaiñ, burom bad ka jingïa ryngkat lang,” ong ka kyrwoh khubor na ka NESO.
Kane ka seng ka la kyntu ïa ki pulit Delhi bad ïa ka Sorkar Pdeng ban pynthikna ba ka jingtohkit kan long kaba khuid ba suba bad ban pynkhlaiñ ïa ki lad ban ïada bad ïa ki lad ban pynsngewthuh ïa ki paidbah ban ïada ïa ki briew kiba na ka thaiñ shatei lammihngi ka ri.
Ka NESO ka la pynpaw ruh ïa ka jingsngewlem sha ki bahaïing bahasem bad sha ki paidbah jong ka Jylla Manipur baroh kawei.
