Noh jingïarap ka HANM Ranikor Circle sha ka longïing kaba shah bamduh ha ka ding

Ranikor, ‘Nailur 11: Ka Hynñiewtrep A’chik National Movement (HANM) jong ka Ranikor Circle, hapoh ka jingïalam u President, Bah Brusstar Thongni, ryngkat bad ki dkhot jong ka seng, ki la leit ban ai jingïarap sha kawei ka longïing kaba la shah bam duh ha ka ding ha Mawpoklait, kaba hap hapoh ka Hima Langrin, South West Khasi Hills District.
Kum shibynta ban pyni ïa ka jingsngewlem bad ka jingïadonbynta lang ban ai mynsiem ïa ka longïing kaba la shah ktah ha kane ka jingjia, ka HANM Ranikor Circle ka la leit ban noh synñiang da ki marbam, ki jaiñ kup thiah, ryngkat bad ka jingïarap pisa ban pyndap ïa ki jingdonkam ba kongsan jong ka longïing kaba la shah ktah ha ka jingpluh ding jong ka ïing.
Ka seng ka la pynpaw ruh ba watla kam lah ban ai bun, hynrei kane ka jingïarap ka long tang kum ka dak kaba rit jong ka jingsngewlem bad ka jingïatreilang bad ka longïing kaba shem lanot ha kum kane ka por.
Ha kane ka jingïalang ba lyngkot, ka kong Hilen Nongphlang kum ka kmie, bad u bah Pilit Lyngdoh Marshilong, kum u kpa, ryngkat bad ki hynñiew ngut ki khun, ki la pynpaw ïa ka jingsngewnguh kaba khraw ïa ka HANM Ranikor Circle bad ïa u President ka HANM South West Khasi Hills District, Bah Lambokstar Marwein, halor ka jingïarap kaba ki la ïoh.
Ki la ong ba kane ka jingjia ka dei kawei na ki jingeh kiba khraw ha kaba kum ïing ka sem ka la mad, bad ki la ai khublei ïa ka seng kaba la wan ban kyrshan bad ai jingïarap ha kum kane ka por. Namarkata, ki la kitbok kitrwiang ruh ba ka HANM kan nang kiew shaphrang bad kan nang ïai trei ban leh ïa ki kam isynei bad ban ai jingïarap ïa kiwei pat ki longïing bad ki paidbah kiba shem jingeh bad kiba donkam jingïarap.