Mad jingeh ki nongrep ba lum khajna ki nong Assam ha Umsohphoh, ujor ka HYC sha ki bor district

Nongpoh, Lber 03: Namar ka jingeh ba mad da ki paidbah ka thaiñ khappud ka jylla Meghalaya bad Assam ba hap hapoh ka Raid Nongtung, naka jingshah khrong khajna ha kawei khyrdop kaba don ha Umsohphoh bala ap da ki briew jong ka Assam, ka seng Hynniewtrep Youth Council, Raid Nongtung Circle mynta ka sngi kila leit ban ujor syndon sha u Border Magistrate ka Ri-Bhoi u Raja Brahma ban tuklar bad ban peit ïaka jingeh kaba ki paidbah ki mad ha katei ka thaiñ.
Ka seng hapoh ka jingïalam u Bah Hercules Suting President haka jingdonlang u Samla S Masharing General Secretary lem bad ki dkhot kila aiti ruh da ka jingujor sha u Raja Brahma ban pynpaw ba ka jingdon katei ka khajna ban lum naki nongrep kala ktah shi katdei ïaki paidbah bad khamtam ka jingshongsyier haka leit ka wan namar ba ka dei ka jaka kajia pud.
U Bah Hercules Suting kum u President ka seng haba kren sha ki lad pathai khubor u la pynpaw ba kum ka seng ka dap da ka jingsngewkhia kaba jur hadien ka jingioh jingtip ba ki paidbah ba shong ba sah haka thaiñ khappud khamtam ka dei ka jaka ba kajia pud ba hap hapoh ka Raid nongtung ki mad jingeh kaba khraw ban hap ban siew khajna ha kawei ka khyrdop kaba don ha Umsohphoh bala ap da ki briew naka thaiñ West Karbi Anglong jong ka jylla Assam.
U la ong ruh kumba ki nongrep kila pynpaw ba ka dor jong ki mar rep kala nang hiar bad ki nongrep ki shah khñiot dor ïaki mar ba ki rep, hynrei mynta ki ngat sa ha ka jingshah lum khajna ha katei ka khyrdop bad ka jingdon katei ka khyrdop kala ktah shisha ïaka ioh ka kot jong ki paidbah, khamtam ka shongsuk shongsaiñ.
Shuh shuh ka seng kala kyntu ruh ïaka bor synshar district jong ka Ri-Bhoi ba ka dei ban shimkhia mardor ïa katei ka kam bad ban weng ïaka jingeh ki paidbah nongshong shnong ha katei ka thaiñ khamtam ki nongrep.