Shillong, Rymphang 17 : U State President jong ka National People’s Party (NPP), Bah Prestone Tynsong ba dei ruh u Symbud Myntri Rangbah ka Jylla ha ka sngi Nyngkong u la ong ba ka party ka buh thong ban kyntiew ïa ka thaiñ Riwar bad khamtam eh ban pynkylla dur ïa ka ïew Pynursla kum ka Khyndailad ha shwa ka snem 2028.
Tangba ha kawei ka liang u la kynthoh pat ïa ki katto katne ki MLA kiba khlem wan ban tied ïa ka jingkhang jong ka Secretariat na ka bynta ki kam pynroi ha ki constituency jong ki hynrei ki kloi pat ban kynnoh ba ka sorkar ka leh shilliang khmat.
Haba kren ha ka jingïalang ïalap elekshon na bynta u kyrtong ka party na Langkyrdem – Laitkroh Bah Rahbok Tynsong bad kumjuh na bynta ka kyrtong na Nongshken Constituency Kong Grace Kharpuri kaba long ha Pynursla, u Bah prestone u la ong, “Ngi don ka thong ban wanrah ïa ki kam pynroi ha ka constituency, ïa ka thaiñ Ri War bad ruh ïa ka jylla hi baroh kawei. Ngi kwah ban shna da ka jaka pynieng kali kaba biang da kaba pynkynriah noh ïa ka ophis PWD sha kawei pat ka jaka bad ngin pynkylla noh ia kane ka jaka kum kawei pat ka Khyndailad (Police Bazar). Kane kan long ka jingkyrkhu kaba khraw ïa ki paidbah ka thain Riwar. Nga kular ba shwa ka snem 2028 ngin lah ban pynkylla dur ïa kane ka jaka. Kane kan urlogn tang lada ka don ka jingïatrei lang bad ka Dorbar Shnong.”
U Symbud Myntri Rangbah u la pynpaw ruh ïa ka jingsngew bynñiaw halor ka jingkynthoh pyrshah ïa u bad ia ka sorkar jylla ha ki rynsan social media bad ong ba kane ka long tang ka jingpyrshang ban ïalam bakla da ka Liang Pyrshah. Tangba, u ong ba ki paidbah ka Pynursla pat kim dei satia kiba lah ban shah pynngop ne shah pynthame ha ki.
“Ki paidbah ka Pynursla kidei kiba donburom bha bad dei na ka daw jongphi ba nga long kumne kumba nga long mynta ruh. Kumta, nga kyrpad ïa phi ki paidbah ka constituency jong nga ba kin ai lang ka jingkyrshan ïa i Kong Grace Kharpuri bad ïa u Rahboklang Tynsong bad pyntikna ba kine kin ïoh ia ka jingjop khnang ba kin long ka kti kamon ka kti kadiang jongnga na bynta ki kam pynroi jong ka constituency,” u la ong.
Shuh shuh u ong ba kadei ka jingshisha ba ki skim kam pynroi ki duna bha ha ki District Council hynrei kam don jingeh eiei pat naba da ka jingïatrei lang bad u, ki skim kin sa tuid hi ha ki constituency. “Kumta phi dei ban pyntikna ba kine ki kyrtong jongngi kin ïoh ban khur ïa ka jingjop ha kane ka elekshon MDC,”u la bynrap biang.
U ong ruh ba ki liang pyrshah ki sah lyngoh lut haba ka sorkar ka la pyntikna ba ïa ka mini secretariat ha Pynursla yn sa pynurlong noh shen. “Nga don ïa ka thong ban wanrah ia ka roi ka pa ha man kawei pa kawei ka shnong jong ka constituency. Hadien ba la dep ka surok two-lane, kan dei ka jingkyrkhu kaba khraw ïa ki paidbah ka thain Riwar. Kumta, ngi long kiba donbok ba ngi don ha ka sorkar, u Blei u kyrkhu ïa ka constituency Langkyrdem kaba rim bad ïa ka Pynrusla constituency namar nga ïoh beit ban don ha ka shuki ha Secretariat (naduh ba jop). Kane kadei ka sien jop kaba san na bynta jongnga bad phi lah ban khmih lynti ba bun kiba bishni ba pihuin bad ki pyrshang ruh ban tan ïanga shapoh hynrei ngin ym ailad ïa ki.”
Halor ka jingkynnoh ka Liang Pyrshah ba ka sorkar ka shah liang, u Bah Prestone u la ong, “Kumno phin kynnoh ba nga shah liang haba ngam pat ju ïohi ba phin wan ban kynduh ïanga ha kamra. Lada phi kwah kam pynroi, wan sha Secretariat bad kyrpad ïa u Bah Prestone ban ïarap ïaphi.”
U la kynthoh tyngeh ruh da kaba kdew ïa kawei ka party ba don ha ka Liang Pyrshah namar ka jingong ba tang ba la ieid jaidbynriew la biang bad ba ki paidbah ki donkam satia ïa ki kam pynroi watla ki la dep ban kular ïa ki ha ki rynsan ialap elekshon.
“Kadei ka kamram jong uwei pa uwei u MLA ne MDC ban tied ïa ka jingkhang jong ka Secretariat na bynta ki kam pynroi ha ki constituency jong ki. Hynrei sniewbok ba don ki MLA kiba khlem leh ïa kata bad kane ka ktah ïa ka constituency jong ki bad ïa ki paidbah nongshong shnong,” u la ong.
