Nongpoh, Rymphang 15: Ka Department of Social Work ka skulbah University of Science and Technology Meghalaya (USTM) mynta ka sngi ka la plie paidbah ïa ka ‘National Conference’ ba ar sngi kynthih, halor ka phang ban ïa tai ïa ka hok ki riew tymmen bad ruh ka hok longbriew man briew, ha kaba ïa kane ka National Conference la kyrshan da ka National Human Rights Commission, New Delhi.
Ka Kong Ïamonlang M. Syiem, Chairperson ka Meghalaya State Women’s Commission ka la shim bynta kum ka kongsan bad la synran lang da ka jingdon lang ka Kong Felicita L. Majaw, ka dkhot barim ka Meghalaya State Women’s Commission.
La sakhi lang ruh ha kane ka sngi da ka jingdon lang u Himanshu Rath, Founder bad u Chairman ka Agewell Foundation, India, u Prof. Abdulrahim Vijapur, Chairman barim ka Department of Political Science ka Aligarh Muslim University (AMU). U Dr Amit Choudhury, u Dean, School Technology & Management, USTM bad ki samla pule.
Kum ba la pynpaw, ka thong ba hakhmat kane ka National Conference ka long ban ban khia halor ka hok ki riew tymmen bad ïa ka hok longbriew man briew jongki.
Ha ka jingkren pdiang, u Prof. G.D. Sharma, Vice-Chancellor ka USTM, u la ban khia jur halor ka jingdonkam ban phai khmat kyrpang ïa ki jingeh ba ïa kynduh ki riew tymmen ha ka longbriew ka man briew bad u la pynpaw ruh ba la donkam ban don ki jingtreikam ba kyrpang ban ïada ïa ka hok ki riew tymmen bad ban pynneh pynsah ïa ka burom jong kine ki riew tymmen ba kim dei ban shah lehbein ha ïing ha sem bad ha ka imlang ka sahlang.
Haba kren kum ka kongsan ha kane ka sngi sdang jong kane ka National Conference, ka Kong Ïamonlang M. Syiem, ka la kren halor shibun ki mat ba kongsan kaba ïa dei bad ka hok longbriew manbriew ki riew tymmen bad ka la ban khia ruh ba la donkam kata ka jingïatrei lang ban ïada ïa ka hok ki riewtymmen ha kane ka imlang ka sahlang jongngi.
Kane ka jingïalang la shim bynta ruh da ki riew shemphang bapher na ki skulbah, ki riew shemphang kiba tbit ha ka jingthaw aiñ bad ki kynhun seng bhalang, ba ki la ïa tai bin pa bin ban pyrkhat kyrpang ïa ka hok ki riew tymmen la ki dei ki shynrang ne kynthei ha kane ka jylla bad ka ri. Ka thong ka long ruh ban ai shibuh ki jingai jingmut ban thaw ïa kita ki rukom treikam kiba pynthikna ba ki riew tymmen kim dei ban shah lehbein la ha ïing ha sem ne ha ka imlang ka sahlang ha kane ka jylla bad ha ka ri hi baroh kawei.
