Kane dei ka kabu ïa nga ban bteng dawa pynrung ïa Ktien Khasi ha Khyrnit ba Phra : Dr D.R.L. Nonglait

Nongpoh, Jymmang 18: “Haba im ka ktien, im ka jaitbynriew” ong u Dr DRL Nonglait u kyrtong MP ka NPP ha kane elekshon shiteng samoi haba hiar ban leit ïalap elekshon mynta ka sngi sha ka thaiñ Mawhati, ban pan ka jingkyrshan naki paidbah ha kane ka elekshon shiteng samoi ban wan ban jied ïaki nongmihkhmat sha iing dorbar thawaiñ ka ri namar kum u rangbah u ba la ju ïakhun ban pynurlong ïaka jingdawa ban pynlong ktien sorkar ïaka ktien khasi kaba la urlong dang shen bad u ba dang sahnud ban pynrung pat sa haka khyrnit ba 8 ka riti synshar ka ri.
Haba kren ha kane ka sngi haka jingïalang kana la long ha iew Mawhati u Dr DRL Nonglait u la ong ba bun naki paidbah ki buh ka jingkylli kum u President ka Khasi Author Society balei u leit ïasoh ïalade sha ka seng saiñ hima, bad ïa kane ka kam u la ong ba u don u Vice President jong ka seng u ban shimti bujli ïaka kam haba u President um don namar ka mynsiem jong u ka long ban ïaleh bad ïai trei ban kyntiew ïaka ktien khasi nalor kiwei kiwei ki mat kiba kongsan lada ki paidbah ki ibit ban jied ïa u.
Halor ka jingïaid lynti ban kyntiew ïaka ktien khasi u Dr. Nonglait u la ïathuh ba la pynlong ïaki rally, ki jingïalang paidbah ha kylleng ka ri Khasi Jaintia bad wat shaduh nongbah Delhi ban ïakynduh ïaki myntri sorkar pdeng bad haka jingïakren ki don kiei kiei kiba donkam ban pynjur ïaka jingdawa ïaka ktien khasi ban rung haka khyrnit ba 8 ka riti synshar ka ri India.
“Ngi la dawa ruh ïaka sorkar jylla ba dei ban pynlong ktien sorkar noh ïaka ktien khasi namar kane ka dei ka kamram ka sorkar jylla, ngi la buddien bad namar ki tnad sorkar ki suki bad rai ban pynlong ki jingïaleh ban pynkynmaw ïa u Myntri Rangbah bad ki MLA halor kane ka mat bad dang ha kine ki khyndiat bnai, kata haka 16 tarik Ïaiong 2026 la khot ïangi da ka ophis u Myntri Rangbah haka jingïakren la shim ïaka rai ban pynlong ktien sorkar noh ïaka ktien khasi bad haka 27 tarik Ïaiong la ioh ka jingmynjur na u lat ka jylla u ba la shon ïaka muhor ban pynlong ktien sorkar ïaka ktien khasi bad sngewnguh ïa kane ka sorkar bad kane ka dei ka mat kaba nga la thew ban woh ba ka sorkar ka pyrshang ban pynurlong ïaki jingdawa hynrei ka kam kam pat kut bad donkam ban pynrung syndon haka khyrnit kaba 8, mano ban leh ïakata, kata ka long ka mat ba nga puson.
U la ong ruh ngam shym mut ban ïaleh elekshon, hynrei haba wan ka jingkyrpad naka liang ka party kaba don haka liang synshar nga ïathuh ïa kane haki nongai buit jong nga, kiba la ong ba kane ka dei ka kabu jong jaitbynriew, kumta u la shim ïaka rai ban pdiang ban pyndep ïaki jingangnud namar donkam ban ïashim bynta bad donkam ban pynbha ïaka jylla kaba la tip kum ri tip briew tip blei, ka ri ka akor ka burom ban pynkylla ïaka saiñ hima, ban kyntiew ïaka pule ka puthi bad kiwei kiwei.
Kum u kyrtong ka NPP u la kyrpad ruh ïaki paidbah ban kyrshan ban weng ïaka jingpyrshah bad sngew party, ban weng ïaka jingisih, ka jingïashun, ka jingkynshoit para briew hynrei ban khan ban duriap naka bynta ka bha ka miat ka roi ka par bad ka shongsuk shongsaiñ ka jylla ban kyntiew ïaki shnong ki thaw bad ka imlang ka sahlang, namar lada ngim lah ban ieid parabriew kumno ngin ieid ïaka jaitbynriew kumta ngi donkam ban dem lang ban rah ïaka jingjop bad hapdeng kum kane ka jinglong ka ri ba jaitbynriw to ngin ïakut jingmut ban pynshai ban pynbha bad ban tei.
Ha kane ka sngi naka liang ki heh NPP kynthup ruh ki MLA naduh u Dr Celestine Lyngdoh, Charles Marngar, ka Kong Rona Khymdeit MDC ka Nongpoh, u Bah Hamlet Dohling bad kiwei kiwei ki hiar lang sha katei ka jaka ban ïalap paidbah bad ban pynshai ïaki nongrim ka party NPP lada ki poi sha ka thong ha kane ka elekshon MP ban wan, namar kum ka party ka don shibun ki jingangnud ban wanrah ki jingkylla haka imlang ka sahlang.