Shillong, Jymmang 18 : Ka Bharatiya Janata Party (BJP) Meghalaya ha ka sngi Nyngkong ka la pyntip ba ha ka 20 tarik kin sa shong pyrkhat na ka bynta ban jied ïa u/ka kyrtong ban aireng na ka party ha ka elekshon MP shiteng samoi kaba la shong thylli na ka jingkhlad kyndit u Dr. Ricky AJ Synkong ha u Rymphang.
Na ka liang ka party ka la dep ban jied saw ngut ki kyrteng na ka bynta kane ka elekshon tangba ïa ka rai kaba khatduh pat kin sa shim ha ka jingïalang kaba la buh ban long ha ka 20tarik mynta u bnai.
“Ki la don saw tylli ki kyrteng kiba la dep ban ïa kren bad syllok na ka bynta ka elekshon MP shiteng samoi. Hynrei na ka bynta ka rai kaba khatduh ngi la rai ban ïa kren ha ka jingïalang kaban long ha ka 20tarik mynta u bnai,” ong u MLA ka BJP na Pynthor ba dei ruh u Myntri barim ka sorkar jylla.
Haba kylli hato ka kyrteng jong u Myntri ka Arts and Culture ka sorkar jylla Bah Sanbor Shullai lane ka kyrteng u Ophisar IPS barim ka jylla paw neem, na ka liang u Bah Hek u la ong, “Ngan nym jer kyrteng hynrei ki don lypa saw ngut ki kyrteng hangtei.”
U Bah Hek u la pynpaw ruh ba na ka liang ka party kan sa pynieng beit u kyrtong ha kane ka elekshon kumba kiwei ki party ki la sei la ki jong ki jong ki kyrtong.
